MASALIGAN ang source ko nga ang luy-a (ginger) isa ka antiviral herb – upod sa ahos, eucalyptus kag oregano.
Amo gani nga nagbalik na ako sa pag-inom sang tahu nga gina-producir sang ginapabukalan nga luy-a.
Matuod, sunu sa mga doktor, ang antiviral medication, bisan sa forma pa sang bulong, indi makatapna sang pagluntad sang virus – katulad sang COVID-19.
Apang makabulig ini pugong (inhibit) sang virus agud indi siya makasulod sa aton lawas upod sa mga immunity booster nga gina-take naton.
In fact, kon yara na ang virus sa aton lawas makapugong gihapon ang antiviral, labi na gid sa forma na sang bulong, nga indi maglapta ang iya infection kag mapabilin ang aton maayo nga kahimtangan.
Of course, ang vaccine gid ang makatapna sang panghalit sang virus, katulad sang COVID-19, nga ginapaabot naton nga ma-producir na sa indi madugay.
***
Meantime, indi kita mag-worry gid sa COVID-19, sunu sa mga doktor mismo, kay na-survive na gani naton ang mas mapanghalit nga duha pa ka coronavirus nga SARS kag MERS nga namintas man sa bug-os nga kalibutan sadtong nagligad nga dekada.
Sunu gani sa masaligan nga online report sang ABS-CBN sadtong Enero 29, 2020, 35 percent sang pumuluyo ang pinatay sang MERS, 14-15 percent sang SARS, kag 2.72 percent lang sang COVID-19 sandig sa report sang China, sa diin una namintas ang COVID-19.
So, easy lang kita kag indi gid magbulag sa Ginuo para sa aton lubos nga kompyansa kag kalinong sing panghuna-huna batok sa pagpamintas sining COVID-19.
***
Wala pa kita nakabaton sang balita parti sa Marso 10 nga schedule sang pag-hearing sang 11 ka House bills nga naga-propose sang renewal sang ABS-CBN TV network nga ma-expire na sa Marso 30.
May pasalig sa Kongreso nga mapa-extend ang broadcast ang ABS-CBN tubtub mahusayan ang renewal sini tubtub sa katapusan sang subong nga Kongreso sa tuig 2022.
Indi kita makasalig sini, ugaling. May quo warranto nga petisyon sa Korte Suprema nga luyag mag-imbalido sang existence sang ABS-CBN kag mag-expire na gid lang ini sa Marso 30.
Kon may ara gid man kita masaligan, amo gid lang seguro ang minilyon nga mga pumuluyo nga padayon nagakahidlaw sa mga palagwaon sang ABS-CBN nga indi naton luyag paslawon.
Tani respetuhon man sang Kongreso kag sang Presidente ining hipos lang nga panindugan sang mga pumuluyo nga ipabilin ang ABS-CBN sa iya pag-broadcast tubtub pa sa masunod nga 25 anyos.
Tani indi man mawad-an trabaho ang sobra 10,000 sini nga mga empleyado.
Founding principle sang aton Demokrasya – kag sang ABS-CBN – ang Free Press, nga paagi sini indi madiktahan sang gobyerno ang kawsa sini, kag sang mga pumuluyo, sa hilway nga pagpahayag.
Gintindugan ini sang ABS-CBN sa panahon ni Marcos, kag nag-sufrir pa sa idalom sang iya pagginahum militar. Ginpasara ni Marcos ang ABS-CBN kag gin-take over ang Meralco sang mga Lopez nga ginapangunahan ni anay Vice President Fernando Lopez kag sang iya utod nga si Don Eugenio Lopez Jr. sang Iloilo.
Nagbalik halin sa 9 ka tuig nga exile sa San Francisco, USA ang nabilin nga mga Lopez sa pagpanguna ni Geny Lopez (Eugenio Lopez III) sang magdaug ang Edsa Revolution 1986.
Nabawi nila ang Meralco kag liwat gintukod ang ABS-CBN from scratch tubtub nagbalik bilang nagapanguna nga TV network sa pungsod.
Dala man gihapon sang ABS-CBN ang ila tindug sa Free Press bilang independent media outlet sa kawsa sang Demokrasya. Liwat nag-ani ini sang pag-atake bisan sa panahon na gani ni Presidente Duterte.
Of course, wala sing perfecto, kag indi man absolute ang kinamatarong sa Free Press. Gin-aku sang mga pamunuan sang ABS-CBN nga nakasayop man sila. In fact, nangayo ini sing pasaylo sa kay Presidente Duterte angot sa ginsiling nga indi pagpalayag sang election propaganda sini sadtong kampanya sa May 2016 election, kag iban pa.
Tani mangin “magnanimous in victory” si Presidente kay amo gid ina ang eleksyon – indi tanan upod sa imo – kag mapatawad na sini ang ABS-CBN kag kadlawan na lang ang mga napierde.
Of course, sa penalidad nga pwede ipataw sa ABS-CBN sa ila sayop, segurado kita nga atubangon nila ini nga may humilidad, indi lang ini masarhan para sa mga pumuluyo. (w_mateojr@yahoo.com/PN)
