Naga-iraw ang PECO

MAKASARANG pa ayhan magserbisyo ang Panay Electric Co. ukon PECO sa iya mga konsumidor diri sa syudad sang Iloilo?

Palamangkutanon ini nga nagatublag sa paminsaron sang tagsa ka Ilonggo matapos ang tuman ka lawig nga brownout nga nagluntad sadtong Oktubre 29 kag 30.

Madasig ang PECO sa pagpagwa sang ila espekulasyon tuhoy sa natabu nga sila ang ginsabotahe. Bisan pa nga wala man sila sang may ginatumod kon sin-o apang maathag nga wala naman sila sang patuhoyan pa nga iban.

Ang matarong nga tawo kag tampad nga negosyante wala nagapatu-patu sa iya mga pahayag, wala nagakomporme sa espekulasyon kundi nagapangusisa sang lubos agud nga mahibaluan ang kamatuoran kag makahimo sang patas kag angay nga pahayag.

Bangud sa sini nga alegasyon sang PECO, gilayon man nga nagdepensa ang Global Business Power Corp. nga tag-iya sang Panay Energy Development Corp. nga ang pagkadula sang suplay sang kuryente sadtong Oktubre 29 ang tuga sang technical problems sa isa sa iya mga coal-fired power plant.

Nagsabat man ang National Grid Corp. of the Philippines nga ang pagkadula sang suplay sang kuryente sadtong Oktubre 30 ang tuga sang mga problema sa Negros-Panay submarine cable.

Bangud sa patarasak nga pahayag sang PECO kag pagpanagang gamit ang taming sang iban, siya ang ginbalikan kag ginpulihan tubtub nga nabali ang iya wala balasehan nga espekulasyon.

Makapoy gid man magpanagang sa mga kapaltahan, ilabi na kon natipon ini sa malawig nga panahon nga wala gintalupangod, ayhan bangud sa pagkamalipaton ukon ayhan bangud sa pagpatumbaya.

Gina-usisa man ang PECO kag ginapasabat sang Energy Regulatory Commission tuhoy sa reklamo sang Iloilo City Government sa mga nagakatabu nga sunog gikan sa mga poste sang kuryente, ilabi na nga asud-asud ang mga nagluntad nga insidente sang damlag lang.

Nagdugang pa diri ang pahayag sang Business Permits and Licensing Office sang syudad nga wala pa sila sang may nahatag nga business permit sa PECO bangud sa wala pa sini nabayaran nga 90 million pesos.

Ginpahayag ni Norman Tabud sang BPLO nga nag-apply para sa business license ang PECO apang ila ginpaiway ang pag-isyu para diri bangud man sa rekomendasyon gikan sa City Treasurer’s Office nga may 90 million pesos nga balayran ang PECO sa iya real estate taxes, lakip na ang mga multa, umpisa Marso 2019.

Bangud sa nagtuhaw nga impormasyon, nagpabutyag ang PECO nga handa sila nga magbayad sang ila obligasyon sa buhis sa syudad sang Iloilo.

Gin-athag sang PECO nga gindala nila sa korte ang isyu kon dapat gid nila nga bayaran ang 10-year retroactive real property taxes bangud para sa ila mas komporme sila nga magbayad sang para lang sa lima ka tuig.

Nagakabalaka ako sa nagakatabu. Gikan sa reklamo sang mga konsumidor sa ila ginabayad, sa serbisyo nga ila ginabaton, kag sa sitwasyon nga ila ginaagwanta, nagareklamo man ang gobyerno sang syudad sa ila balayran sa buhis, sa ila kakulangan sa pag-atipan sa mga poste nga ginatunaan sang pagtuhaw sang kalayo, kag ang makabig paglas-ay sang kaantanan nga nagapatunga sa ila sang mga power producer kag transmission company.

Mga konsumidor, mga negosyante kag mga opisyales sang syudad, lantawa ang sitwasyon sang PECO, lantawa ang gabok kag nagahilay na nga mga poste, nagakul-aw na nga latay sang kuryente sa mga kable, kag ang pag-iraw sang sanag sang suga kaangay sa naga-iraw nga palaabuton sang PECO. ([email protected]/PN)

LEAVE A REPLY

Please enter your comment!
Please enter your name here