Nagabaslanay

SA NASILING na, ang kahadlok yara lamang sa paminsaron. Ang indi naton makita kag wala pa naton nasumalang amo ang aton ginakakulbaan. Nagahimo kita sang senaryo sa aton pinsar kag kita mismo ang nagapahog sa aton kaugalingon.

Madamo sang natublag sa nagakahinabu sa aton nga pungsod. Hitabu nga masami mabatian sa radyo, mabasahan sa diyaryo kag makita sa mga social media site kag telebisyon. Mga hitabu nga makasilidni, pagpatay sa isa ka tawo, pag-utas sa kabuhi sang mga inosente ukon bangud sa agrabyo.

Matuod nga kon aton lantawon ang sitwasyon makatulublag gid man bangud nga indi normal nga hilikuton ang pagpatay sa isig-kapareho kag wala kita sang moral kag legal nga salandigan kon ngaa nga ibutang naton sa aton kamot ang hustisya. Apang kon aton padalman ang nagakatabu, makita naton nga ang insidente nag-ibwal bangud nga may nagsinda sa mitsa sang sini nga hilikuton. Kon indi gilayon makita ang matuod nga motibo, una nga ginalantaw kon ano ang background sang biktima kag kon ngaa ginpamatbatan siya paagi sa bala.

Sa nasiling na, indi kita makakontrol sa kaakig sang naghimo sang krimen, indi naton matungkad ang kadalom sang iya ginaagunto nga pilas kon ngaa naghimo siya sang tikang nga makahas.

Indi naton matakus ang kabug-at sang mga rason kon ngaa nahimo nila ang krimen. Apang, ang maathag nga may yara sang nagtimalos.

Matuod gid man nga sang ginlunsar ang Oplan Tokhang madamo sang mga nasambod sa ilegal nga druga ang nagtinguha nga makalampuwas apang gindalukan sang higayon sang mga tawo nga nangin kabahin sang ila pagpanglakaton, nangin kaupod nila sa paglusong sa bisyo, kag kasalo nila sa pagsuyop sang asu gikan sa gintunaw nga bato.

Nahadlok ang mga yara sa trono sang sindikato nga mabuyagyag ang ila nawong, nga mahublasan sila sa mata sang publiko kon ituad na sila sang ila mga kaupdanan sadto. Kag bangud sa sini nga kahadlok, naghimo sila sang makahas nga paagi nga dapat papason, dapat utason agud nga wala na sang may mabungat pa nga tinaga sa bisan sin-o nga naga-usisa.

Madamo sang nagkalapukan nga mga persona nga ang pasuni bangud nga pagkulantro sa ila katransaksyon sa negosyo sa ilegal nga druga.

Nakita man ini nga kahigayunan sang mga unipormado nga persona, ila ginsakyan ang sitwasyon agud nga pukanon ang nagatago sang ila sikreto agud nga indi na magkanta pa sa palaabuton.

Mismo ang mga nagasuksok sang uniporme kag nagapanaming sang ila tsapa ang imbolbado man sa negosyo sang ilegal nga druga, ang iban sa ila nagakonsumo, ang iban sa ila nagaduso agud nga makaganar sang daku.

Kon indi mapukan ang isa ka tawo, indi mabuyagyag ang iya kahilabtanan sa ilegal nga druga, madamo sang nagakatingala, kag nagakakibot nga ang napukan may yara sang mantsa.

Sa nagakatabu nagakatingala kita bangud wala kita nagalaum nga imbolbado ang isa ka persona kag mahibaluan na lamang kon madakpan ukon mapukan.

Mabudlay tungkaron kon ano ang ila mga motibo sang pagpatay sa isa ka tawo apang maathag nga sila ang nagabaslanay. (bertladera@gmail.com/PN)

LEAVE A REPLY

Please enter your comment!
Please enter your name here