Nagalikaw sa pagtransaksyon sa bangko

MADAMO pa sang mga Filipino ang wala sang bank account suno sa Bangko Sentral ng Pilipinas kag suno sa ila 2017 Financial Inclusion Survey nagapakita nga 60 porsyento sang mga ginpamangkot ang nagsiling nga wala sila sang bastante nga kwarta rason nga wala sila sang bank account.

Kabug-usan nga 52.8 million ka Filipino ang wala sang bank account kag nagatago lang sang ila kwarta sa ila alkansiya, sa ila buon-buonan, sa bakalan, kag sa diin pa man nga pamatyag nila luwas kag indi makawat ang ila gintago nga kwarta.

Kapin sa 21 porsyento sa mga ginpamangkot ang nagsiling nga indi nila kinahanglan ang magbangko kag 18 porsyento ang nagsiling nga wala sila sang mga dokumento nga ginakinahanglan sang bangko.

May nagarason man nga mahal ang magbukas sang bank account, kulang sa ihibalo kon paano magbukas sang account, wala sang trabaho kag wala gid sang ihibalo tuhoy diri.

Ginabulubanta nga yara sa 15.8 million ukon 22.6 percent sang kabug-usan nga adult population ukon indibidwal nga naga-edad sang 15-anyos kag pataas ang nagapanag-iya sang bank account kag makabig nga nag-imprubar ang kadamuon ipaanggid sa 22 porsyento sadtong tuig 2015.

Matuod gid man nga sa karon nga panahon mapahapos ang pagbaton sang sweldo, pagtago sang kwarta, pagpadala ukon pagbaton sang remittance kag pagbayad sang mga balayran sa kuyente, tubig, telepeno kag iban pa nga bill.

Apang may mga pumuluyo man nga mas ginapili nila nga magpila sang malawig agud nga magbayad bangud sa pagpati nga may charge ukon patong ang mga bangko sa ila ginabayaran, rason man nga 1.3 percent lamang sa mga Filipino ang may yara sang electronic money ukon e-money account.

Kon aton talupangdon, ang mga bangko sa karon nagapangita sang paagi agud nga makalagas sa ginatan-ay nga serbisyo sang mga remittance centers nga may madamo nga kliyente kag halos ginatumpukan sang mga tawo kaysa sa mga bangko.

Mas madamo man sang nagapautang nga mas mahapos ang proseso kag makwa nila gilayon ang kwarta kag magamit sa negosyo kaysa bangko nga tuman ka damo sang papeles nga ginapangita kag madugay mag-aprubar sa nagahulam.

Nakita gid ini nga higayon sang mga negosyante ang daku nga bahin sang mga Filipino nga wala nagasulod sa bangko rason nga sila ang nagatan-ay sang serbisyo sang bangko nga indi masibod kag sila mismo ang nagapalapit sa mga tawo.

Masiling man naton nga tuman ka tradisyunal kag mahinalungon ang mga bangko kag nagasandig na lang sa mga dalagku nga negosyante kag sa mga manggaranon nga nagasalig sa ila.

Kon ligwaton sang bangko ang ila panimuot, hatagan sang higayon nga malab-ot ang magagmay apang tuman ka damo nga mga tawo nga magtransaksyon sa ila bangko, ayhan kon tingbon, as daku pa kaysa sa mga dalagku nga tag-deposito nila.

Dapat gid nga pun-an sang gobyerno ang bakante nga espasyo sang serbisyo kag sabton ang pagkinahanglan sang madamo nga tawo nga makaangkon sang kaugalingon nga bank account.

Dapat nga tu-an kag maghulag ang gobyerno agud nga madapit ang mga tawo nga nagalikaw sa pagtransaksyon sa bangko. (bertladera@gmail.com/PN)

LEAVE A REPLY

Please enter your comment!
Please enter your name here