ANG HIPON nga tulog pagaanuron sang anod. Ini ang halambalanon nga nagalaragway sa mga tawo nga wala sang hinalung-ong sa nagakatabu sa iya nga palibot, ginaganoy siya sang tinion kag ginadala sa doog nga wala niya ginalauman.
Kaangay ini sa nagakatabu sa mga jail warden sang Bureau of Jail Management and Penology 6. Makapila na ka beses nga ginkakas ang jail warden kag gin-islan apang padayon sa gihapon ang pagpasaway sang mga priso kag ang pagtransaksyon sang ilegal nga druga.
Una sila nga natay-og sang madamo sang namonitor ang kapulisan nga padayon ang transaksyon kag pagbaligyaanay sang ilegal nga druga kag ang mandu gikan sa mga high value target nga yara nahunong sa sulod sang ila pasilidad.
Naghiwat sang sinapol ang PNP, BJMP kag ang local government unit agud nga mahisayran ang ini nga bagay kag mahatagan sang angay nga solusyon.
Nalipas ang panahon apang padayon kag tayuyon ang impormasyon nga nasagap sang kapulisan. May mga personalidad nga nagakadakpan sa buy bust operation nga ang ila kontak yara sa sulod sang karsel.
May mga nagakadakpan nga nagahana nga magpalusot sang ilegal nga druga sa pasilidad sang BJMP paagi sa pagtago sa idalom sang sud-an nga yara sa suludlan. May yara man sang nagapalusot sang mga cellphone paagi sa paglihap sa tsinelas tubtub nga madasok kag matago ang manipis kag magamay nga cellphone nga indi mamutikan sang nagarikisa sa pasilidad sang BJMP.
Kon lantawon ang sitwasyon, mas marot kag bungga-itan ang mga priso ikumparar sa mga nag-eskwela kag mas hangkilan nga mga katapo sang BJMP, apang nagakaristo sila sa diskarte, masami sila nga malutsan kag nagakabilin sa tabtaban.
Mas madamo sang makita ang priso nga nagalantaw sa blangko nga pader kag kisame kaysa sa jail officer nga nagapangape sa ugsaran kag mahamuok ang tulog sa malum-ok nga ulunan.
Indi man naton masiling nga nag-umal na ang ila matalom nga pinsar bangud nga nalutsan sila sang mga kulang sa edukasyon, apang bangud posible nga nangin halog sila pagtuman sang ila katungdanan, nangin pasapayan sa ila obligasyon kag mas ginapasulabi nila ang ila personal nga palaligban kaysa sa trabaho nga ila ginaatubang.
Indi solusyon ang masami lang nga pag-rigodon sang mga tinawo. Dapat may manabat kag kasuhan sang todo. Indi dapat paghiluton ukon masahehon ang mga nagakasayop ukon may kakulangan sa trabaho.
Dapat ipakita sang regional office nga may yara siya sang ngipon kag kahibalo siya magkagat kag nagadulot ang iya bangkil.
Likawan man kuntani sang BJMP-6 ang hampol kag banyos nga solusyon sa ila kahuyang sa trabaho. Dapat paminsaron nila kon ano ang ginapaminsar sang priso agud indi sila maristo kag malutsan.
Samtang nagapaminsar ang BJMP-6 kon ano ang mga pamaagi agud ang mga priso ila mareporma, ang mga priso naman nagapaminsar kon paano makaporma, kon paano sila makadiskarte kag makalusot.
Tion na nga rebyuhon sang BJMP kon ano ang mga kabangdanan ngaa nagahuyang sa tentasyon ang ila mga jail officer agud matumod ang ugat sang ila kapaltahan.
Mabudlay tukibon ukon tumuron ang ugat sang kapaltahan samtang may jail officer nga nagamurarat nga bulag sa iya katungdanan./PN
