Nagsaad na ang pumuluyo

MASAKIT ang malutos, nagatudok ini sa balatyagon kag panimuot. Gintinguhaan man ang tanan agud nga mapresentar ang kwalipikasyon kag agud nga mahaylo sa pagboto apang nangin kabus ini sa talaksan sang nagapili sa ila mangin lider.

Nagakalipay na ang nagdaug, nabulong na ang ila kakapoy kag ang bunga sang ila paghimakas ang ila na ginapiyestahan.

Makita sa mga hitabu nga mahapos ang tanan magbalik sa normal, gilayon nga nagbaton sang kalutusan ang mga ginkabus sang kapalaran.

Nangin malinong man ang mga tagsakdag sang kada kandidato. Walang sang may mabatian nga gamo nga nagluntad sa kabarangayan. Indi kaangay sadto nga pagkatapos sang eleksyon, may gamo nga nagakatabu, may binasulay, may dumugay bangud sa ka-emosyunal sang mga lideres kag sumulunod sa tagsa ka barangay.

Kaangay lang sa daw wala sang may natabu. Pagkatapos nga mahibaluan ang mga nagdaug, nangin mahamuok ang tulog sang mga botante kag ginkalimtan na nila ang bahin sang ila kabuhi nga naglabay tuhoy sa pila ka adlaw nga kampanyahanay.

Lantawa ang sitwasyon, lima ka adlaw ang nakalipas, daw wala lang sang eleksyon nga natabu. Matalunsay ang tanan. Malinong ang tanan.

Makabig ayhan naton nga naghamtong na ang panimuot sang mga botante?

Kunsabagay, ang mga kandidato mismo ang wala na nagapagamo. Sila mismo ang nagmato-mato sa pagpahayag sang ila kalutusan kag nagpasalamat sa mga nagsakdag sa ila kandidatura.

Makabig ayhan naton nga naghamtong na gid man kag nagtaas na ang lebel sang panimuot sang mga kandidato?

Maathag man nga malayo ang abanse sang kasumpong rason nga mabudlay na magkwestyon pa sa resulta. Mas dalayawon ang kandidato nga nagapakanubo kag nagabaton sang kalutusan sa iya kasumpong nga may pinakadamo nga boto nga naagom.

Bisan ano pa nga sahi sang kandidato ang nagdaug, angayan man ukon indi sa posisyon, may kaso man ukon wala, dapat naton batunon ang resulta sang piniliay. Ini ang esensya kag kabuhi sang demokrasya, ang pagpangibabaw sang luyag sang kadamuan kaysa sa luyag sang pila lamang.

Yara sa desisyon sang botante ang iya luyag botohon. Indi naton makwestyon ang ila pagpili sa ila naluyagan apisar nga tuhay ini sa aton naluyagan ukon mas may ihibalo kita batok sa ila ginpili.

Batunon naton nga may tuhay nga panabor ang mga botante kaysa sa aton naluyagan, may tuhay sila nga paborito kag mas may tuhay sila nga ginakilala.

Kon may salabton man sa kasuguan ang napilian, hulaton naton ang pamatbat sang korte.

Kon pakulahaw ang ila kandidatura, hulaton naton nga magtukal sila sa ila alukaba agud mahublasan sila sa ila matuod nga katuyuan sa pagpapili sa sina nga pwesto.

Kon ano man ang kapalaran sang mga nagpadalagan sa naglabay nga piniliay, kon masakit man ukon manamit, kon napaslawan ukon nangin madinalag-on, ang tawo nagsaad na sang ila desisyon.

Lauman na lang naton nga ang mga nagdaug magtuman sa ila mga ginpasalig sa pumuluyo. Kuntani indi sila mangin arogante sa ila nasakupan bangud sa makahulubog nga poder nga ila ginauyatan.

Ipabugal ang kadalag-an, pasalamatan ang mga nagsakdag, kag pasidunggan ang tingog sang pumuluyo nga nagpili sa inyo labaw sa inyo mga kasumpong. (bertladera@gmail.com/PN)

LEAVE A REPLY

Please enter your comment!
Please enter your name here