Nagtahaw na ang pagdabdab sang balatyagon

MAKAKULUGMAT ang pag-ibwal sang kalayo, ang tanan nga iya malab-ot ang nagamakot kag kon indi masalbar mahimo nga mangin abo sa dila sang kalayo.

Kaangay sang balatyagon sang tawo, ini ang nagasagrab, naga-ibwal kag sa tagsa kaa magtahaw ang natungdan ang nabilin nga maluya kag wala na sang pwersa.

Nabutang sa kontrobersiya ang mag-amay nga Garin bangud sa natabu sadto kay PO3 Frederick Macaya Jr. sang nagligad nga Disyembre 2018 sa sulod sang Guimbal Police Station.

Madamo sang pakamalaut nga nabatian batok sa mag-amay nga Garin gikan sa mga nakakita sa nadangatan ni Macaya, sa nakabati sa iya mga panugiron kag sa mga naugot sa mag-amay.

Bilang mga tawo, ila ginbaton sang may pagpainubuson ang ila kasaypanan. Naimpito sa sitwasyon nga sa ila paglantaw may kapabayaan nga nabuhat ang pulis rason nga nagsingki ang ila balatyagon.

Luyag nila nga mangin malinong ang ila banwa, ilabi na sadto nga may kahiwatan nga ginapabugal sang ila mga pumuluyo apang namantsahan sang kinagamo.

Luyag lang ipatudok sang mag-amay ang disiplina sa mga pumuluyo, ipabatyag sa ila nga wala sang lugar ang mga samong sa ila matawhay kag malipayon nga selebrasyon.

Apang nagsunlog ang kapalaran. Nagluntad ang wala ginalauman kag nangin sentro sang kontrobersiya ang ila banwa. Halos tanan nga mata, indi lang sang mga Ilonggo kundi pati sa mga yara sa iban nga bahin sang kalibutan, ang nagalantaw sa hitabu sa Guimbal.

Pagkatapos sang masanag nga pag-iwag sang suga, nag-abot ang higayon nga ini ang nag-iraw, nawad-an sang kasanag. Pagkatapos sang pag-ibwal sang kalayo kag makaon ang tanan nga madilaan sini, napalong ang kalayo, nagtahaw ang kakulba kag nagkalmante ang palibot.

Naglipas na ang panahon. Napali na ang pilas. Nakabangon na gikan sa masakit nga inagihan ang mga natungdan. Nagalantaw na sila sa masanag nga butlak sang adlaw kag nagatamwa sa bintana nga may ulayhon nga pagpanamyaw.

Mangin ipokrito kita kon manginwala kita nga wala kita nagasingki, kon wala gid kita nagapangakig, ukon makahimo sang bagay nga mahimo naton mahinulsulan. Ang tawo ginaganoy sang iya balatyagon, sang iya emosyon, kag nagakahulog sa pil-as sang paghinulsol.

Nabaton na sang tanan ang natabu. Nagpangayo na sang paghinulsol ang mga natungdan. Nagapadayon na ang pagtiyog sang ila kalibutan kag ang pagserbe sa ila mga nasakupan.

Halos nalipatan na sang tanan ang natabu kag natabunan na sang mga maayo nga ginahimo sang pamilya Garin.

Nagapangibabaw na ang pagbalikid sang tawo sa ila mga paghimakas kon paano mapa-uswag ang ila banwa kag dsitrito, kon paano nila mapabugal sa iban nga lugar kag kon paano sila ginapadulungan sang mga bisita kag turista.

Magapabilin ang reyalidad nga bangud sa ila maayo nga hinimuan nagtin-ad ang ila doog. Indi ini matabunan sang isa ka hitabu nga nagsunlog sa ila kapalaran.

Mas ginadumdom sang mga pumuluyo sang Guimbal kag sang primer distrito ang mga nabuhat sang pamilya Garin kag ang mahimo pa nila nga mabuhat para sa katin-aran sang ila nga doog.

Matuod nga nagtahaw na ang pagdabdab sang balatyagon kag ini ang ginalikupan na sang masanag nga palaabuton. (bertladera@gmail.com/PN)

LEAVE A REPLY

Please enter your comment!
Please enter your name here