Natalupangdan gid man

NAGAPANGULINTAS na ang city government sang mga ordinansa may kaantanan sa regulasyon sa trapiko sa syudad sang Iloilo.

Madamo sang napasar nga wala nahatagan sang importansya agud mapatuman, ayhan nalipatan, ayhan ginligwat, ayhan ginpabuyan-buyanan tubtub nga napanas sa mga prayoridad kag natampukan sang mga nagluluntad nga hitabu sa syudad.

Matuod gid man nga masakit maglahog ang kapalaran kag kinahanglan kon kaisa nga magabunggo ang aton ulo agud malinu kag makamarasmas kita, makamuklat nga may mga bagay nga dapat atipanon, makabugtaw agud atubangon ang mga obligasyon nga wala nahatagan sang atensyon.

Ugaling, mas malala gid ang sini nga sitwasyon nga kinahanglan pa nga maghalad sang inosente nga kabuhi antes kita makamuklat sa kamatuoran nga may sayop nga madugay na kuntani nga gintadlong.

Kinahanglan gid ang pagtulo sang luha agud mahugasan ang aton kalimutaw kag maathag naton nga makita ang mga bagay nga dapat hatagan sang atensyon kag prayoridad, kag ang pagtalupangod sa mga napabay-an nga katungdanan.

Nabuyo kita sang lantaw sa kaanyag sang syudad, sa nagasangkad kag mas nagalaba nga mga dalan, nalipat kita nga dapat dugangan sang nagabantay agud magpatuman ordinansa.

Dapat tun-an sa kon diin angay ipahamtang ang u-turn slot kag dapat wala sang pedestrian lane sa mga lugar nga masyado ka buylo na ang dalagan sang salakyan.

Likawan naton ang desinyo santu sa kombenyente sang mga impluwensyado nga mga negosyante nga luyag nila indi sila mabudlayan sa ila pagtaris sa dalan. Luyag nila nga wala sang sablag sa atubang sang ila establisemento, luyag nila nga sa ila atubang magadulog ang jeep agud direkta nga magpanaog kag makadiretso sa ila balaligyaan ang mga pasahero.

Matuod gid man nga ang aton traffic ordinance ginapanday santu sa hingyo sang mga negosyante, kon ano ang mas makapabor kag bentaha para sa ila. Nagapangimon ang ila katupad kag ang iban nga kakompetensya rason nga nagahimo man sang paagi nga sila man ang madesinyuhan sang traffic ordinance nga pabor sa ila.

Samtang, may yara kita sang clamping ordinance, speed limit ordinance kag iban pa apang wala sang athag nga direksyon kon ipatuman ukon kalimtan.

Tion na nga seryusuhon ang pagpatuman sang madamo nga ordinansa sa trapiko, pagpatuman nga patas kag wala sang pinilian agud indi pagyagutaon ang aton gobyerno sang mga impluwensyado kag mga manggranon nga mga tawo.

Tion na nga patun-an ko ano ang dapat nga desinyo sa trapiko ang ipatuman sa Diversion road, lakip sa iban pa nga mga dalan nga may kaangay nga kasangkad kag kalabaon.

Samtang nagasangkad ang dalan, nagalargo ang pagpadalagan kag nagabag-o man ang diskarte sang nagamaneho sang salakyan.

May nagakatentar nga magtapak sang todo sa iya gasolinador kag tilawan ang pwersa sang iya salakyan sa matawhay kag masangkad nga dalan, supak ini sadto nga panahon nga ang dalan gamay kag gutok rason nga wala sila nagapaburhot.

Masakit para sa mga nalisdan ang natabu apang paagi sa ila nakamuklat ang tanan sa kon ano ang dapat himuon, balikdon ang mga nalipatan, tadlungon ang mga sayop kag mas amligan ang masunod nga henerasyon.

Natalupangdan gid man ang mga ordinansa nga dapat ipatuman kag regulasyon nga ginpabuyan-buyanan. (bertladera@gmail.com/PN)

LEAVE A REPLY

Please enter your comment!
Please enter your name here