GINANEGOSYUHAN ang negosyo. Masami na naton ini nga mabatian kag madugay na ini nga gina-eksperyensyahan sang bisan sin-o man. May yara gid sang magapaminsar kon paano makaganar sa tugda sang panahon kag pagkinahanglanon.
Sa masami problema sang iban kon sa diin makabakal sang tiket bangud nga sa tagsa ka mag-anunsyo nga mahimo na makabakal sini, makalipas ang pila ka inoras ang tiket ang nagakahubas. Wala na sang tiket pa nga mabakal bangud naubos na.
Bangud sa sini nga sitwasyon, kon ginapangita na ang tiket sang mga intresado magbakal, higayon na ini sang mga nagagata ang utok bangud ila na nga ipagwa ang ginbakal nila nga tiket kag ibaligya sa mas mataas nga presyo.
Nagatuga sila sang artipisyal nga kakulangon agud nga magduso sa presyo nga magmahal kag wala sang may mahimo ang manugbakal.
Kon inyo mamutikan, lantawa bala ngaa madamo sang turista nga nagapungko sa mga entablado sa mga judging areas, paano sila makabakal sang tiket? Indi ayhan nga may mga tawo nga ginasugo ang mga nagadumala sa hotel nga bantayan ang pag-anunsyo nga pwede na makabakal sang tiket kag sila gilayon ang magakompra sang tiket para sa ila mga kliyente nga dumuluong?
May impluwensya ayhan ang mga nagadumala sang mga hotel sa mga nagadumala man sa pagbaligya sang tiket?
Kunsabagay, indi malayo ang punto nga kon mag-marketing ang mga hotel sa ila mga bisita, ila ginabaligyaan sang mahal nga room rate kag lakip na ang package para sa tiket agud nga sigurado nga makalantaw sila sang pagpasundayag, posible pa gid nga lakip sa package ang pagdul-ong sa ila padulong sa judging area kon sa diin sila may yara sang tiket.
Mahimo nga may kunsabo nga nagakatabu sa tunga sang nagabaligya sang tiket kag sa grupo sang mga nagadumala sang mga hotel sa syudad sang Iloilo agud nga indi sila mahuy-an sa ila mga bisita kag indi malugaw-an ang ila negosyo.
Kunsabagay, may garantiya nga ‘sold out’ ang tiket kag mapuno ang mga judging areas kon magbulig sa pagbaligya sang tiket ang mga hotel para sa ila mga kustomer.
Ginaaku man sang Iloilo Dinagyang Foundation, Inc. nga indi madula ang ginatawag nga ‘business hazard’ ilabi pa nga may mga tawo nga nagasakay sa kabantugon sang Dinagyang kag luyag nga makaganar sa mahapos nga paagi.
May nagasiling man nga halos 20 ka tuig na nila nga ginahimo ang pagkompra sang tiket kag pagbaligya sini sa mas mataas nga presyo ukon ila ginapatungan. Makita na sa internet ang ila pagbaligya, gamit ang moderno nga teknolohiya, ang transaksyon ang mahapos na lamang para sa nagapangita sang available nga tiket agud makalantaw sa bansada, makapungko sang hilway kag makalikaw sa pagpanigal-ot sa madamo nga tumalan-aw.
Nagapabilin ang kamatuuran nga ang may ikasarang lang sa balor sang tiket ang makapungko sa ibabaw sang entablado kag makakita sang hayag sa sahi sang pasundayag, samtang ang mga ordinaryo nga Ilonggo nagamantenir sa kibag nga anggulo sang paglantaw, nagaagwanta sa pagpati-al sa init, kag nagapanigal-ot sa kagutok. (bertladera@gmail.com/PN)
