Pagpagusa sa Jaro Plaza

Halos kada tuig na ang kontrobersiya sa Jaro plaza kon sa diin masami ginakwestyon ang sistema ukon pamaagi sang mga kapitanes sa pagdumala. Kadamuan sa ila ang ginahimo nga kenkoy sang mga agalon nila nga pulitiko. Ginapasaot sila sa sonata nga ginapatukar sang mga nagauyat sa ila liog. Nagaubog sila sa lunang sang pulitika.

Nalipay na kita kuntani bangud sang nagligad nga tuig nangin matigdas ang pahayag ni Mayor Jose Espinosa III nga indi niya luyag nga mangin merkado ang Jaro plaza. Dapat nga butangan sang regulasyon ang paggamit sini ilabi na sa panahon sang piyesta sang Jaro.

Nagpadala pa sang sulat sa iya sadto si Arsobispo Angel Lagdameo, ang karon nga Archbishop Emeritus sang Jaro Archdiocese, nga nagapasalamat nga sa malawig nga panahon karon lang natalupangdan ang plaza nga nangin matinlo bangud sa patakaran kag panindugan ni Mayor Espinosa.

Ang mataas nga paghangad ang hinali nga nagtumpilak sa lutak bangud nga kon imo libuton ang plaza, sa sulod lunsay kayang-kayang sang mga baligya ang imo makita, samtang sa sagwa yara naman ang mga kiosko nga nagasaklam sa bahin sang dalan nga nagahatag sang huol sa mga motorista kag sa mga pasahero.

Kon sadto luyag ni Mayor Espinosa nga magluhod ang mga kapitan sa iya, subong siya na ang nagapasubahar bangud sa nagahilapit nga piniliay. Matuod, ang panindugan mahimo nga magahuyang sa tion sang eleksyon. Dapat mangin mabuot kag indi mangin madumot.

Wala sang maathag nga solusyon ang problema sa Jaro plaza sa tagsa nga nagapadulong ang piyesta bangud nga wala sang pulitiko ang luyag magtusmaw sang ila ulo kag indi niya luyag nga malumos.

Sadto pa man may ginpatigayon na nga imbestigasyon si anay Councilor Lex Tupas tuhoy sa mga kontrobersiya sa Jaro plaza kaangay sang sinuktanay nga kuno wala nagasulod sa kaban sang syudad kundi ginaangkab sang mga takaban nga empleyado.

Naglipas lang ang panahon, wala sang konklusyon ukon maathag nga solusyon ang nadangatan sang imbestigasyon.

Nagsunod ang imbestigasyon ni Councilor RLeone Gerochi angot man sa suktanay sang pwesto nga tuman ka mahal kag ang pagsukot sa kuryente gamit ang linya sang gobyerno apang wala nagasulod sa kaban ang kantidad sang ila ginabayaran.

Sagunson ang paghiwat sang pagpamati sang magtimbang nga bahin tubtub nga naalimunaw kag ginpanas sang panahon sa pang-ino-ino sang tawo.

Subong, padayon ang paghulag sang tuhay nga mga aktor sa kaangay nga entablado. Isa lang ang katuyuan, makaganar paagi sa pagdumala sa Jaro Agro-Industrial and Charity Fair gamit ang plaza sang publiko.

Ang kapyestahan sang Nuestra Senora dela Candelaria ginasaulog para sa debosyon kag indi agud makaganar sang daku nga komisyon, nagahiwat sang parada kag indi agud makakita sang kwarta, nagasindi sang kandila agud makaagom sang kapawa kag indi agud nga ang bulsa mabuta.

Kinahanglan naton sang maathag nga polisa kon paano gamiton ang plaza, dapat may ipasad nga kasuguan kag may maisog nga pagpatuman nga patas sa tanan.

Dapat nga magpangibabaw ang konsensya agud nga wala sang matabu nga pagpagusa sa Jaro plaza. (bertladera@gmail.com/PN)

LEAVE A REPLY

Please enter your comment!
Please enter your name here