Pagpatay sa ABS-CBN panugod man sang kamatayon sang aton Demokrsya?

MABUHAY ang EDSA Revolution 1986! Gin-selebrar ini sang pungsod sang nagligad nga Pebrero 25. Pwera forever na ang mga diktador, katulad ni Marcos, kag ang luyag pa mag-diktador diri sa Filipinas!

***

Sang gin-deklarar ni anay Presidente Ferdinand Marcos ang martial law, ukon ang pagginahum militar, sadtong Setyembre 21, 1972, una nga nabiktima ang Free Press, ukon ang kahilwayan sang pagpahayag.

Una nga establecimiento nga ginpatakpan amo ang ABS-CBN TV network.

Sa panahon nga ini nga ang presidente sang Filipinas amo na si Presidente Rodrigo Duterte, nga wala lipud-lipod nga naga-idolo kay anay Diktador Marcos, daw history repeats itself naman seguro ang  matabo liwat sa ABS-CBN.

Nahibal-an sang tanan kon ano ang kaakig ni Presidente Duterte sa ABS-CBN. Tungod ina kuno sa indi pagpagwa sang campaign material sini sadtong Mayo 2016 nga eleksyon, kag ang pagpagwa lang sang campaign material sang kontra partido.

Ang akusasyon nga mabug-at gid ni Presidente Duterte amo nga nag-violate kuno ang ABS-CBN sang iya frankisa, nga ma-expire sa Mayo 4, 2020, nga todo gin-deny man sang ABS-CBN sa Senate Hearing sang Lunes.

Ugaling basi kansar lang ang paninguha sini kay daw indi makakita kasanag ang ABS-CBN sa alintabo sang kaakig ni Presidente Duterte, nga ginauyog gid ang Senado agud indi mapahanugutan nga ma-renew ang frankisa sini. Notwithstanding sang Separation of Powers sa tunga sang Presidente, sang Kongreso kag Judiciary (korte).

Nahibal-an ta na kon paano maggamit sing poder si Duterte sang position sang Presidente, nga ginasiling nga mas poderoso pa sa Presidente sang Estados Unidos.

Ang masakit pa kay may panimuot si Duterte nga unforgiving, ukon madumot, indi lang batok sa mga kriminal kag mga durugista, kundi bisan pa sa Simbahan Catolica tungod sa sala kuno sang isa niya ka maestro nga pari nga daw sala na ini sang bug-os nga Simbahan.

Bisan gani sa kahuyang sang Filipinas, mahimo pa gani ni Presidente Duterte nga awayon ang Estados Unidos, nga nangin malapit pa gani sang ulihi sa balatyagon sang daku nga kadam-an sang mga Filipino tungod sa aton panimuot nga mapinatawaron.

In fact, napatawad naman naton gani ang pungsod sang Hapon despite sang mapintas nga pangginahum man sini sa aton.

Kon subong maisug makigbulag si Presidente Duterte sa Estados Unidos, ina tungod seguro kay kadampig na niya ang Tsina kag Rusya. Ugaling lang kay mabudlay niya seguro mapasunod ang mga pumuluyo tungod gani kay madugay na nga maki-Kano kita.

Well, except sa iya kag sang iya mga sobra ka loyal sa iya. Isa sini ang maisug gani nagsiling nga “I will swim and sink with President Duterte!”, nga samtang senador daw “bodyguard” kon pa-astahon kag indi senador nga sibilyan ang panghunahuna kag malawak ang paghangop sang kon ano ang husto kag indi.

Gani indi kita magsalig nga indi mapasunod ni Presidente Duterte pa ang iban katulad sing nahimo ni Marcos sadto sang gin-deklarar niya ang martial law, nga pwede man ni Presidente Duterte mahimo bisan pa sa subong naton nga Constitution tungod sa poder niya sa military.

Kag tungod sini, bisan ang Kongreso kag ang Korte pwede niya mapaluhod!

Matuod ginpahanugotan niya ang Freedom of Information nga wala mahimo sang Kongreso paagi lang sa iya Executive prerogative.

Sang sini gani nanakga siya nga tugtan pa niya ang media sa pag-kastigo sa iya tubtub sa kaya nila sa pag-destroy sa iya.

Apang, ang himo lain sangsa hambal. In fact, madamo nga mga media practitioners ang ginpakalain, kag ginpamahog pa, tungod gin-kritikar siya.

Ginapilit man niya sa Senado kag sa Department of Justice, paagi sa isa ka quo warranto nga petisyon sa Korte Suprema, agud indi ma-renew ang frankisa sang ABS-CBN bisan dapat athagon pa anay ang kaso sini sa Senado kag sang National Telecomunications Commission.

Kontra man ni Presidente Duterte ang dalagku nga mga negosyante, ukon oligarchs, apang may mga oligarchs man sa iya likud nga yara pa gani sa iya panguluhan.

Tungod sini, may kulba kita sa pwede madangtan sang aton Demokrasya sa idalom ni Presidente Duterte nga gindaug naton sadto batok sa mapiguson nga martial law ni Marcos paagi sa Edsa Revolution 1986.

Liwat, MABUHAY ANG EDSA REVOLUTION 1986! (w_mateojr@yahoo.com/PN)

LEAVE A REPLY

Please enter your comment!
Please enter your name here