PINAKAUNA nga selebrasyon sang Semana Santa, pagkatapos sang ikaduha nga inaway pangkalibutanon, nga wala sang tawo nga nagpasakop ukon wala sang pagtililipon sang mga tumuluo sa sulod sang simbahan bangud sa ginapatuman nga enhanced community quarantine agud nga indi mahatagan sang higayon ang virus nga makapadayon sa paglaton sa iban nga tawo.
Kuntani makapamalandong sang matuod ang tawo, suno sa iya pagtuo, kag mahangpan niya ang mensahe sang iya pag-igsister sa sini nga kalibutan. Kuntani mahangpan niya ang pulos sang iban pa nga mga gintuga, kon ano ang esensya sang sapat kag tanum kag kon paano amligan ang kalibutan nga iya ginapuy-an nga ginpahulam lang sa tanan nga nagakabuhi.
Tanan kita mga umalagi sa sini nga kabuhi. Wala sang may nagabato ukon nagatenir. Tanan kita may katapusan rason nga dapat mapuslanon para sa tanan ang aton ginagawi sa kada tion nga kita ang nagakabuhi.
Kon aton pamalandungan ang mga bagay sa aton palibot, ang aton kabuhi kag pagpangabuhi, masanagan kita sa kon ano ang mas importante sa kabuhi kag ginahatagan sang importansya agud mabuhi.
Sa karon, nakamuklat kita nga dapat ang aton investment mas labaw para sa ikaayong-lawas kaysa sa mga kasadyahan ukon festivals. Dapat unahon naton nga paligban kon paano magpag-on ang aton lawas bangud ini ang matuod nga kalipay kaysa sa umalagi nga higya-higya.
Maathag man nga indi preparado sa pandemic ang kada henerasyon. Bisan pa nga may yara na sang nauna nga pandemic apang tuhay sadto ang sitwasyon, tuhay ang mga tawo nga nagsumpong kag tuhay ang virus ukon bacteria nga nagpanghalit. Leksyon lamang ang ila mabilin sa tion kag mga istratehiya kon paano sila nagpakigbatu sadto.
Talalupangdon man nga naulian ang kahimtangan sang kalibutan. Nagapapali ini sang iya pilas, nagapaayo sa kahalitan nga ginatuga sang tawo sa matag-adlaw sini nga pagsinarayo. Kag maathag nga kon wala sang aktibidad ang tawo, wala sang halit nga maagom ang kalibutan.
Wala sang pastor, pari ukon relihiyoso nga lider ang makasalbar sa pasyente nga gina-atake sang coronavirus. Bisan sila ang biktima sang virus, bisan ang mga doktor nga nagapakig-away diri ang nagakapukan man. Madamo sa ila ang ginlutos sang ila gina-away nga virus.
Natun-an naton nga apresyaron ang mga healthcare worker nga kon kaisa naga-isahanon sila, abandonado kag ginakalimtan apang wala sila nagasungka kag nagapadayon sila sa ila katungdanan bisan pa yara sila sa tunga sang mabudlay nga kahimtangan.
Nabatyagan na sang tawo kon ano ang ginabatyag kag kahimtangan sang mga sapat nga yara sa sulod sang animal zoo, sa sulod sang hawla, ukon ginakurong. Wala sang kinatuhay ang aton sitwasyon sa ila bangud indi kita makagwa sa aton puluy-an sa kahadlok nga kita ang malatnan sang virus nga nga makatalagam.
Maathag nga ang kamatayon wala nagapili sang rasa, duag sang panit, ukon kahimtangan sa sosyudad sang isa ka tawo. Bisan sin-o pa nga manggaranon, harianon man ukon puraot, ordinaryo nga tawo ukon gamhanan, ang tanan yara sa kaluoy sang virus. Wala sang gahum, manggad, kag poder nga magapugong sa paglaton sang virus.
Wala sang pulos ang langis sa isa ka sosyudad kon wala sang may nagakonsumo ukon nagagamit. Mapuslanon lang ang isa ka bagay kon ginagamit kag nagamahal ang balor kon mas madamo ang nagagamit. Minilyon ka salakyan ang wala na nagarondalya sa mga karsada, pila ka gatos ka libo nga mga barko ang wala nagalayag sa lawod, kag subong man sa pila ka gatos ka libo nga mga eroplano ang wala nagalupad sa kahawaan bangud sa COVID-19. Nagkunol ang konsumo sa langis. Dugang pa ang madamo nga pabrika nga wala nag-operate. Nakaginhawa man ang kalibutan. Matinlo nga hangin na ang aton mahaklo.
Makabukas sa paminsaron sang tanan ang nagakatabu kon paano makasalbar sang madamo na kabuhi ang prevention ukon pagtapna kaysa pag-akto sa ulihi nga tion. Indi malain ang magpreparar kon sa madamo nga kabuhi ini makasalbar. (bertladera@gmail.com/PN)
