[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PANUGDAON ‘ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”]
ROBERTO ‘BERT’ LADERA
[/av_heading]
[av_textblock size=” font_color=” color=”]
MAKATALAGAM ANG KAHADLOK
Sa diin na ang bugalon nga nagadumala sa banwa? Sa diin na ang masami nagasambit nga luwas ang Syudad sang Iloilo? Ang matunog nga nagasinggitan, una pa nga nagdalagan.
Mabudlay matuod kon naanad ka sa pakuno-kuno kag ginalimbungan mo mismo ang imo kaugalingon. Nagapahayag sang isa ka bagay apang tuhay naman ang ginapatihan.
Masakit maglahog ang kapalaran bangod ang nagabutig amo ang una nga ginalupig, ang tanan niya nga gindupla iya man nga dilapan.
Daw kasan-o lang nga napalibutan sang masobra 10 ka pulis si Mayor Jed Patrick Mabilog. Daw kasan-o lang nga ginaputos sia sang gwardiya nga nagatipon sa iya palibot nga halos daw pader nga naga-amlig sa iya. Mabudlay sia nga palapitan, mabudlay sia nga halitan bangod sa pila ka bantay nga nagapanigurado nga indi sia mabutang sa peligro.
Kon nagataris sia sa dalanon, may nakauna na nga duha ka pulis nga nakamotorsiklo, may salakyan pa gid nga isa nga bastante man sa iya mga gwardiya kag may nagasunod pa gid sa likod agud nga magbantay sa mahimu matabu sa convoy.
Antes makalab-ot sa isa ka lugar, may yara na sang mata nga nagalantaw sa sitwasyon nga amo ang nagatimbre sa iya tinawo kon tion na nga magpadulong sia didto.
Sadto, tuman ka kontrolado sang alkalde ang iya palibot. Nagasinggit sia nga malinong kag matawhay ang syudad kag wala sang kabalak-an sa seguridad. Ginahimu niya ang panug-an samtang ginaputos sia sang iya gwardiya kag kapulisan. Ginapasalig niya nga tuman ka luwas kag malayo ang peligro sa mga tawo nga wala sang gwardiya ukon proteksyon kaangay sa iya ginaagom.
Kaangay sang lawod nga may taub kag hunas, kaangay sang adlaw nga nagabutlak kag nagatunod, kaangay sang kabuhi nga may ginabun-ag kag nagakapatay, ang tanan may ginsugoran kag may katapusan, wala sang permanente kag ang tanan umalagi.
Bangud sa mga nahumlad nga mga hitabu sa mata sang mga pumuluyo, nagbag-p ang sitwasyon, nabayluhan sang pagnguynguy ang sadto matunog nga harakhak, nagkul-aw ang nagabanaag nga duag, kag ang kalipay ginputos sang pagkatublag.
Nagtahaw na ang kaisog, nagdominar na ang kahadlok. Ang sadto ginatangla, halos indi na magpakita.
Matuod nga ang tawo kon kaisa nagakalipat nga ang tanan umalagi sa sini nga kalibutan, wala kita sang may ginapanag-iyahan kag ang aton naagom lunsay higayon lamang.
Wala sang poder, wala sang manggad, wala sang gahum nga makasagang kon manukot na ang kalibutan, kon tion na nga magbayad sa mga nahimuan.
Makaluluoy lang si Mayor Jed Patrick Mabilog nga nagaabaga sang tanan nga palas-anon nga gintuga sang iya mga tinawo, sang iya mga kakilala, sang iya mga abyan, kag sang mga nagpakilala nga nagasuporta sa iya.
Gingamit sia nga instrumento para sa ila kaugalingon nga benepisyo, sia ang gindayaw samtang sila ang nagapaayaw. Apang sa karon, sia ang nagabatyag sang tuman ka kakapoy, apektado ang iya ikaayong-lawas.
Kaangay sang mga ulod, sila ang magakahulog kon wala na sang may maut-ot nga unod.
Magatuga sang balatian ang stress rason nga makatalagam ang kahadlok./PB
[/av_textblock]
[/av_one_full]
