MADAMO sang nalipay bangud wala sang klase kag trabaho sa gobyerno sadtong Lunes, Marso 18, kag ini may kaantanan sa ika-74 ka tuig nga pagdumdom sang victory day sa Panay, Romblon kag Guimaras.
Masami nga ginatawag nga Liberation of Panay kag ini ang naandan na apang mas angay kuno nga tawgon nga victory day. Kon paminsaron, isa gid man yadto ka kadalag-an batok sa mga Hapones kag indi makabig nga nahilway sa pagka-ulipon kag opresyon bangud madamo pa sang mga hitabu ang nagluntad pagkatapos sang Marso 18.
Kinaandan na nga may ginahiwat nga seremonya sa Balantang Memorial Cemetery National Shrine sa Barangay Quintin Salas, Jaro, Iloilo City kon sa diin may mga dinapit nga bisita, may nagapamulong-pulong, may pagkilala paagi sa paghatag sang sertipikasyon kag pagdayaw sa mga nahimuan sadto sang mga beterano, ulayhon ang pag-anunsyo sa kon ano ang mahatag sang gobyerno nga dugang nga benepisyo para sa ila.
Kaangay man ini sang reunion ukon liwat nga pagkitaay sang mga beterano nga halos iban sa ila indi na makamurot, may maluya na sang lawas, indi masyado makatikang, kag kadamuan sa ila ang nagapungko na sa wheel chair.
Kon lantawon, sila man ang nagkitaay sadto, sila man ang nagkitaay subong kag kaangay nga nagasapol lang sila sa tagsa nila ka pagdumdom sang victory day. Magluwas gid lamang sa paghatag sa ila sang medalya sa sini nga higayon.
Sadtong Marso 18, 2019, ginhatagan sang United States Congressional Gold Medal Award ang 27 ka mga beterano sang World War II. Nakabaton ang mga beterano nga sanday Cirilo Frigillano, Moses Medina, Jesus Lozarito, Braulio Cabrera, Clemente Mission, Flaviano Constantino, Ricarido Jaculina Sr., Ricardo Hechanova, Ciriaco Villar, Claro Daulo, Castor Gonzales, Eladio Peñaranda, Domingo Daylusan, Antero Armentia, Policarpio Amon, Hospicio Camino, Narciso Casaquite, Loreto Lazo, Enrique Mamon, kag Maria Sirilan.
Ginhatagan man sang posthumous award sanday Felipe Alagos, Efrain Treñas, Jose Miraflores, Santiago Defensor, Adriano Pipardo, Macario Peralta, kag Felomino Flamiano nga ang nagbaton amo ang ila tagsa ka mga himata.
Labaw sa ila pagtambong kag pagmati sa mga pamulong-pulong kag maayo nga balita gikan sa gobyerno, mas manami pa gid nga mapatudok sa ulihi nga henerasyon ang kahulugan sang sini nga pagdumdom, kon ngaa wala sang klase kag trabaho sa gobyerno kag kon ano ang epekto sini sa pagka-pumuluyo sang isa ka tawo sa sini nga pungsod.
Tion na nga hatagan sang madalom nga kahulugan, masiri nga duag, kag mapatudok sa tanan ang kaimportante sang sini nga adlaw. Maapresyar lamang sang kabataan ang istorya kon mismo ang ila lolo kag lola nga mga beterano ang magasaysay sa atubang nila.
Dapat ipain ang isa ka ligwa nga hapon, antes ang Marso 18, nga mangin tion agud pamatian ang mga beterano sa ila mga sugilanon sang inagihan kag kon paano nila ginpakita ang ila pagpangapin kag pagsakripisyo sa pagpalangga sa pungsod.
Samtang may higayon, buhi sila nga magasaysay sang ila sakripisyo bangud indi na naton sila mabatian kon madula na sila sa kalibutan.
Gani samtang may higayon, aton sila nga pasaysayon sang ila inagihan. (bertladera@gmail.com/PN)
