Patron sang Pilipinas

Madamo sang mga lugar sa pungsod Pilipinas ang nagasaulog sang kapiyestahan sang Immaculate Conception kag ginahatagan sang partikular nga atensyon kag seremonya sang Simbahan Katoliko sa Pilipinas.

Mabaskog ang debosyon sang mga Pilipino nga Katoliko kay Maria kag sa idalom sang tig-ulo nga Immaculate Conception, siya ang gindeklarar nga Patron sang Pilipinas sadtong 1942.

Sadtong Disyembre 28, 2017, ginpirmahan ni Presidente Rodrigo Duterte ang Republic Act 10966 ukon ang “An Act Declaring December 8 of every year a special nonworking holiday in the entire country to commemorate the feast of the Immaculate Conception of Mary, the Principal Patroness of the Philippines.”

Magluwas nga Sabado subong nga adlaw, wala sang klase kag wala sang trabaho ang kadamuan, madamo man sang mga banwa sa probinsya sang Iloilo kag mga barangay sa syudad sang Iloilo ang nagasaulog sang kapyistahan.

Matuod gid man nga bantugon ang adlaw nga Disyembre 8, ginadumdom gid ang kapyestahan sang mahal nga patron kag nagapain gid sang tinion ang mga deboto para sa iya.

Nahibaluan nga ang pagpati sang Romano Katoliko nagasiling nga ang Immaculate Conception nga si Maria nga iloy ni Hesus ang hilway sa sala ni Adan, sa masami ginasiling nga ‘orihinal nga sala’.

Gindeklarar si Maria nga mangin iloy sang Diyos sa Council of Ephesus sadtong 431 apang ang paglantaw nga si Maria ang ginhilway sa pagpanubli sang orihinal nga sala ang wala maathagan tubtub sa ika-12 nga siglo sang ginpuisan paagi sa debate nga nasentro sa pagsaulog sang taga-Inglatera tuhoy sa pagbusong ni Maria.

Ang amat-amat nga pagbaton sa panan-awan sang mga Franciscano sa nagsunod nga mga dinag-on ang nabalhag sa mga pagtudlo sang magkatuhay nga mga santo papa ilabi na ni Sixtus IV sadtong ulihi nga bahin sang ika-15 nga siglo kag sang councils of Basel sadtong 1439 kag Trent sadtong 1546.

Tubtub sadtong Disyembre 8, 1854 sang si Pius IX ang ginhingyo sang mayoriya sang mga katoliko nga obispo sa bug-os nga kalibutan nga ideklarar nga ang doktrina ang ginbuyagyag sang Ginoo kag dapat hugot nga patihan sang tanan nga mga katoliko.

Ang kapyestahan sang Immaculate Conception ang ginasaulog sa sini nga adlaw kag sa masami isa ka balaan nga adlaw sang katungdanan kon sa diin ang mga katoliko ang ginapatambong gid sa misa.

Nag-umpisa ang misa sa pamanag-banag tubtub sa pagtakop sang dulom. Madamo sang mga deboto ang nagatambong sa misa, nagasaad sang ila pagtuo kag ang ila pagdayaw kay Maria.

Napuno sang maanyag nga bulak ang mga altar, napalibutan sang makagalanyat nga dekorasyon bilang paghalad kag pagdayaw kay Maria.

May mga prusisyon nga ginahiwat nga ginaupdan sang mga tumuluo kag mga deboto, kadamuan sa ila mga babaye nga may mga edad na.

Sa pihak sang sini nga lalantawon, yara man ang mga lanubo nga nagatambong sa misa, apisar sa limitado nga ihibalo sa ila ginahimo apang padayon ang ila pagtuman sa gina-obligar sa ila nga magsimba.

Kabay nga magapadayon ang aton debosyon kag ang grasya kag kaluoy ni Maria ang aton maagom. (bertladera@gmail.com/PN)

LEAVE A REPLY

Please enter your comment!
Please enter your name here