Planuhan na ang suplay sang tubig

NAG-UMPISA na ang dry season suno sa deklarasyon sang PAGASA kag magalawig pa ini tubtub sa tunga-tunga sang bulan sang Mayo.

Sa karon pa lang dapat may abanse na nga pagtuon ang panguluhan sang syudad kag sa mga kabanwahanan kon ano ang mangin sitwasyon sa palaabuton samtang nagalawig ang tig-init.

Mas maayo nga abanse ang aton panan-awan sa mga bagay nga posible matabu agud makapanigana na kita antes ang sitwasyon mangin isa ka emerhensya kag mabudlay na nga saparon.

Kahibalo kita nga masaku ang tanan sa pagpangita sang paagi kon paano mapangapinan ang pumuluyo batok sa makatalagam nga virus, ginasolusyunan ang mga problema ilabi na kon paano nga indi magutuman ang mga tawo.

Apang, kadungan sini nagahana ang problema sa tubig. Kahibalo kita nga sa tagsa ka mag-abot ang dry season nagapanuktok man sa tagsa ka puluy-an ang palaligban sa kon paano solusyunan ang problema sa tubig.

Indi naton pagpabuyan-buyanan. Mahimo nga indi na ini mamulalungan bangud sa kadamo sang mga bagay nga ginaatipan.

Nagakaangay nga magtumod sang tawo nga magtutok sa sini nga ginalantaw nga mangin problema sang syudad.

Tuhay ang sitwasyon bangud limitado ang hulag sang tawo kag mabudlay ang ila pagsinarayo.

Dapat hibaluon na paagi sa PAGASA kon ano ang mangin sitwasyon sa sini nga dry season, kon ano ang epekto sini sa suplay sang tubig kag sa pananum.

Isunod diri ang pagpangayo sang assessment gikan sa Metro Iloilo Water District kon ano ang ila pagtantyar sa kadamuon sang pondo nga tubig kag kutob san-o ang pagkonsumo sini.

Plastaron na ang sistema sa barangay nga mahimo maapektuhan sang mainit nga panahon. May nauna na nga lista sadto kag kahibalo na kita kon ano nga mga barangay ang una nga maigo sang sobra nga init sang panahon.

Planuhon man ang sistema kon paano mahatagan sang tubig ang kada barangay nga kulangon sini kag kon paano ang tawo ukon pumuluyo makaagom sang sini nga serbisyo.

Tuhay ang sitwasyon sang pagrasyon sang tubig bangud sa ginapatuman nga enhanced community quarantine kag social distancing.

Nakahimo na kita sang mga solusyon kag sistema sadto apang dapat ipasibu naton ini sa karon nga sitwasyon.

Kon wala na sang tubig ang tawo sa iya balay, magaalipasa ini kag maggwa, mangita sang paagi kon paano makalusot sa hugot nga pagpatuman sang home quarantine.

Kon problemado ang tawo, nagakalipat siya sa patakaran kag ang iya pinsar yara sa pokus sa kon paano masolusyunan ang iya palaligban.

Sa subong pa lang ginaduso na naton ang ini nga ideya bilang antisipasyon sa posible nga matabu. Mas maayo nga ginapreparahan naton ang mangin sitwasyon kaysa sa kibuton lamang kita kag magsalangisag na.

Kon bastante ang tubig, kon indi magproblema sa tubig, kag kon tuhay sa ginalauman ang sitwasyon, mas maayo para sa aton bangud wala kita sang problemahon kag ang aton konsentrasyon magasentro sa karon nga problema sa covid-19 nga ginapangatubang naton.

May hurubaton nga ‘hope for the best, expect for the worst.’ Mas maayo ang preparado kaysa sa nagalindo-lindo.

Sa nasiling na, isa sa mga maayo nga kalidad sang isa ka lider amo ang pagtalupangod sang isa ka bagay antes ini mangin isa ka emerhensya.

Sa anuman nga magaabot nga palaligban, ang preparado wala sang pagkalingkang. (bertladera@gmail.com/PN)

LEAVE A REPLY

Please enter your comment!
Please enter your name here