Problema sa on-road parking

MAY NAGAREKLAMO kon ngaa indi maka-park ang iban nga salakyan sa pila ka on-road parking spaces diri sa siyudad sang Iloilo.

Nanotaran kuno nila nga may mga signs dira nga nagasiling “Reserved Only for Clients” kag “Parking Space Only for Tenants” sa atubangan sang pila ka buildings nga nagahangla sa tupad sining mga dalan.

Nakakita kita sini sadto sa Calle Real nga ginpa-untat ni anay Konsehal Erlinda Liberiaga.

Kon amo, may ara pa gid gali sining mga signs. Ang gahimo sini mismo ang establisimiento nga may negosyo ukon office space sa atubangan nila nga daw gina-arkilan nila ang on-road parking space sa gobyerno. Kon wala pa sila, may gabantay pa gani kuno tubtub mag-abot ang ila salakyan.

Dapat hibaluon naton nga ang tag-iya sang dalan amo ang publiko. Indi lang ini para sa pila ka kliyente ukon sin-o man nga negosyante diri nga may salakyan.

In other words, indi dapat poderan ini sang pila lang ka tawo. In fact, indi man pwede ini arkilan (may bayad nga pag-okupar) kay para gani ini sa gamit sang publiko. Dapat first-come first served ang pag-park diri.

Ang exception lang dira, kon sundon ang isa ka US Supreme Court ruling, amo ang pagbayad sa pag-park sang salakyan, nga popular sa Estados Unidos, gamit ang parking meter. Diri gahulog ka sing sensilyo, ukon papelon man kon pwede, baylo sa kon ano ka kadugay sang pag-park.

Indi kuno masiling ining parking fee nga isa ka pagbayad sing arkila ukon paggamit sa negosyo sang dalan. Suhol kuno ini sa kabudlay sang traffic enforcement officer, nga obligasyon man sang pumuluyo nga ihatag sa iya agud mapatuman sing husto ang parking fee law.

Ang isa pa ka reklamo amo nga daw dira lang ma-istar ang pila ka naga-okupar sang building nga bisan tapos na ang ila upisina. Ginabilin pa gani sang iban ang ila salakyan dira kon may gasugat nga lain nga salakyan, kag ginabantayan lang ang mabilin nga salakyan sang pwede nila masuhulan.

Ilegal ini kay may limite ang pagtener sa on-road parking street.

Sunu sa Regulation Ordinance No. 2009-216, Article 1. Definition of Terms, ang naga-onroad parking tubtub lang sa “appreciable period of time”. In other words, wala sing on-road parking nga “forever”!

Article II (On-Road Parking B. City Proper) nagatugut sang on-road parking sa madamo nga dalan diri, katulad sang Mapa Street (parallel parking both sides), kag sa mga dalan Guanco kag Aldeguer (diagonal parking on the left side across Central Market), sa diin may reklamo diri tungod sa kakitid na sini.

Apang, ano gid bala kadugay ang “appreciable period of time” sang pagtener diri sang mga salakyan?

Pwede bala italana sa ordinansa nga sugud lang sa 6 a.m. bag-o office hours sa a las ocho tubtub 6 p.m. pagkatapos sang office hours sa a las cinco? Para makabulos man ang iban nga nagalagaw-lagaw, indi bala?   

Upod man kita sa suhestyon nga i-revisit ang mga ordinansa nga nagapatuman kon diin dapat i-park kag i-prohibit ang salakyan sa kon diin gid bagay.

***

PASIPLAT

Interesting Facts About West Visayas

By Atty. Rex S. Salvilla +

Kilala nga mga Atleta sang Western Visayas – Part 1

(‘American Era Sports’, halin sa Book 7, pahina 9-10)

SANG mag-abot ang mga Amerikano sa Filipinas, ginsuguran nila diri ang ball games, track and field games, boxing kag swimming.

Diri nakilala ang West Visayas sa kalibutan sang si Pancho Villa nagdaug bilang una nga Filipino world boxing champion. Tumandok siya sang Ilog, Negros Occidental. Ginsundan ini siya nanday Small Montaño kag Little Dado nga taga-Negros Occidental man.

Sadtong 1935 kag 1937 nga mga National Interschool Athletic Association (NISAA) Meet, nangin national champion si Rafael Navallasca sang Miag-ao, Iloilo sa 100-meter dash nga naghatag sa iya sang titulo nga “Speed King of the Philippines”.

Sa baseball, si Vicente Jaropillo sang La Paz, Iloilo City ginkilala nga “Best Filipino Pitcher” nga naghatag sing championship sa Filipinas sa baseball sadtong 1923 Far Eastern Games sa Tokyo, Japan.  Ining meet kasubong sang karon nga Asean Games.

Sang 1934 Far Eastern Games, si Josefina Ruiz sang IIoilo City amo ang captain ball sang champion nga Filipino Women’s Volleball Team. (May kasugpon)/PN

LEAVE A REPLY

Please enter your comment!
Please enter your name here