Sa husto nga kahigayunan ang pagsabat sa isyu

NORMAL lang sa mga Filipino ang magkilala sang kabalaslan – sang mga kaayuhan nga nabaton nila halin sa kon sin-o man nga benefactor.

Sa kaayuhan – pangabuhian man ukon proyekto ukon programa nga makasabat sang problema sang pumuluyo – nga ila nabaton, indi na nila gani makita ang ano man nga kalainan sang benefactor.

Kon may isaway man sila sa sining mga benefactor, wala na ini nila ginasapak. “Ang kaayuhan lang ang sa amon, wala na kami sing labot sa kon ano man ang gina-akusar sa ila, ubra na ina ya sang iban,” ang masami gani isiling nila.

In fact, isa man ini ka rason kon ngaa nagapabilin nga mabaskug ang mga ilegalista, katulad sang mga smugglers kag druglords, sa aton komunidad kag kon ngaa mabudlay lupigon ini sang aton gobyerno.

Sa nahibal-an ta na, kilala ining mga smugglers kag mga druglords sa pagdala sang kaayuhan sa mga pumuluyo a la Robin Hood.

Ginakawatan sang mga smugglers ang gobyerno sang buhis agud maka-ganansya sing daku, samtang nagapakita sang kaalwan sa mga pigado agud ma-proteksyunan ang ila hulag batok sa mga otoridad.

Amo man sina ang ginahimo sang mga druglords. Gapakita sang peke nga kaalwan sa mga pumuluyo agud dayawon sila sa ila pagbulig baylo sa paghipos sa ila ilegal nga negosyo.

In fact, mahaylo man gani nila ang pila ka opisyales sa gobyerno agud proteksyunan sila.

In the long run, ugaling, mabuking man sila sang mga otoridad nga sinsero sa ila pagserbisyo, kag sa amat-amat man nga pag-realisar sang mga pumuluyo nga sila man gali may katungdanan sa pag-away sa kalainan.

Ugaling lang kay ningas cogon man ang ugali sang aton mga otoridad kag dungol man ang iban sa ila malain nga gawi. Gani ara man gihapon sila nga nagabalik-balik sa ila ilegal nga buhat.

***

Ang kaayuhan gani nga madala sang isa ka kandidato sa mga pumuluyo isa man sang mabaskug nga isyu agud magdaug sa eleksyon. Labi na gid kon kilala man siya sa iya mahumok nga balatyagon sa mga pumuluyo, katulad ni Iloilo Governor Arthur Defensor Sr.

Tungod sini, indi katingalahan nga magtutok ang mga kasumpong niya sa pulitika sang ila pinakamabaskug nga kanyon sa iya bisan indi na siya kandidato. Ina tungod ang kaayuhan nga dala niya sakop na dira ang kandidatura ni Toto Defensor para Gobernador kag Beng Tupas para Bise Gobernador.

Sa karon gani, ginabanhaw pa sang mga kasumpong ang kuno korapsyon ni Gob, kag kon ano pa dira nga isyu batok sa iya. “Pan-os na nga isyu ining korapsyon” ugaling ang tawag sini ni Gob, nga limpyo ang rekord sa panghimanwa.

Well, kinamatarong ina sang kontra nga magpakalain sa kay Gob. Nga daan lapit na ang Eleksyon 2019 sa diin Isyu kontra Isyu na ang hampang.

Ang maayo nga lider syempre indi lang maghipos. Gapaabot ang pumuluyo nga sabton niya ang ano man nga akusasyon. Indi ugaling mapilit sang kontra nga sabton ni Gob ang ila isyu sa ila binayaran nga mga programa.

Paano abe sabton ni Gob ang mga isyu sa isa ka programa nga “biased” ukon “partial” kay manghalit man lang ina? Natural lang nga sabton niya ini sa mga programa nga “fair and just” sa iya kag sa nagapalamati nga mga pumuluyo.

Okey man ina ang mag-debate sa mga isyu. Ginadayaw nga debater sa UP si Gob kag indi ina problema sa iya. In fact, kon may isyu sa iya ginasabat man niya ini sa outlet sa diin “comfortable” siya, labi na gid kon ”fair and just” ang gadala sing programa.

Kon luyag gid man sang kontra konfrontahon direkta si Gob, may panahon man nga ginahatag ang Comelec agud mag-atubangay ang mga kandidato.

Kon indi gid makahulat ang kontra sa sini nga panahon, puede man sila mag-file sang kaso, sa diin ma-debatehan gid sing maayo ang pag-akusar sa iya.

Gob deserves sining “fair and just” nga kahigayunan sa pagsabat sang mga isyu.

Kag ina sa nasiling ta – sa programa nga “fair and just” sa iya, sa panahon nga ginahatag sang Comelec, kag, kon nagasaku gid ang kontra, ang pag-file nila sang kaso kontra kay Gob sa kon san-o luyag nila. (w_mateojr@yahoo.com/PN)

LEAVE A REPLY

Please enter your comment!
Please enter your name here