SA SUBONG mabudlay pa sa mga pumuluyo ang maghimo sang desisyon sa mga ginatugpo sa ila nga mga potensyal nga mga kandidato sa Mayo 2022 nga eleksyon, labi gid ang para sa pwesto sang Presidente kag Bise Presidente.
Luas sa pwesto sang Presidente kag Bise Presidente, halos pila pa lang gani ka bilog ang nagapabatyag sang ila huyog paagi sa mga interbyu kag pahayag sa tri-media samtang sa Oktubre 1-8, 2021 na ang pag-file sang kandidatura sa nasyonal kag lokal nga eleksyon.
Pila sini sa ila mga bag-o nga nawong nga daw gintulod lang sa public scene sang ila mga supporter nga kinahanglan pa sing lubos nga makilala sang publiko.
Sa ila, kinahanglan pa sang mga botante mahibal-an kon ano bala ang nahimo kag mahimo nila para sa kaayuhan sang mga pumuluyo, kon ano ang ila pamatasan nga luyag nila, kag kon ano ang ila tindug sa mga isyu nga may kahilabtanan sa kaayuhan sang pungsod kag sang mga pumuluyo.
Indi ta man dale-dale mahusgaran ang mga nakilala na naton tungod may karibal na sila nga mga kandidato halin sa iban nga grupo political sa kaisipan kag balatygon sang mga botante, nga kinahanglan mabinag-binag gid sang mga pumuluyo sing maayo bag-o desidiran botohon ukon indi.
Labi na gid kay may leksyon na kita sa mga “fake” nga mga “suluguon sang banwa” nga nagaliwat ang pamatasan kon yara na sa poder.
Mas maalam naman sa karon ang aton mga pumuluyo tungod madamo na ang may mas mataas nga tinun-an. Indi mo na mabakal ang ila boto. Laban-laban kuhaon lang nila ang kwarta sang kandidato apang ang ila gid luyag ang ila botohon.
Labi na gid kay mabudlay na karon mahibaluan sang kandidato kon sin-o ang imo ginboto tungod sa mga moderno na nga mga pahito sa pagbotohay.
May exit polls pa gani nga maka-kwestyon kon gindayaan ukon wala ang inisipay sang boto. May NGO man ang nagabulig sa pagpahibalo sang matuod nga mga resulta halin sa mga presinto.
Madasig man ang pag-inisipay agud mapunggan ang hungod nga pag-delay sang inisipay kag pagkawat sang mga ballot box agud islan ang kaundan sini. Todo gwardyado man ang mga presinto kag ang paglikaw sini sa hilway nga mga lugar sa mga poblacion kag kasubong nga mga lugar.
***
Tungod nagapabilin pa ang impluwensya ni Presidente Duterte admitido bisan sang political opposition ang kabakud sang iya mga kandidato.
Kag kon may pamangkot man nga dapat sabton amo lang kon sin-o gid nga mga kandidato sa pihak nga kudal ang pwede makigsumpong sing maayo kontra sa sining mga kandidato ni Duterte.
Si Senador Manny Pacquao, sang iya ka-tandem para Bise Presidente kag mga kaupdanan sini bala, kon madayon gid man ang pagpihak sang PDP-Laban nga partido?
Ukon ang mga kandidato sang coalition nga ISAMBAYAN nga ginaupdan sang Liberal Party kag pila pa ka grupo?
Personal ta lang nga pagpati, mabakod seguro ang tandem ni Manila Mayor Isko Moreno para Presidente kag si VP Leni Robredo gihapon para Bise Presidente.
Indi man ini pagpakanubo sa kay VP Robredo. Pagkilala lang ini sa realidad nga mas may winning edge si Mayor Isko, sa aton pagpati, ikumparar kay VP Leni. Katulad lang ini sa padayon nga pagdalagan ni anay Vice President Fernando Lopez sa iya pwesto para maseguro ang pagdaug sang ila grupo, nga natabo naman.
Kinahanglan ni Mayor Isko ang popularidad ni VP Leni sa iya baluarte sa Bicol Region agud makakuha daku nga boto dira. Daku man nga bulig sa iya nga maka-tandem si VP Leni tungod sa phenomenal nga pagdaug sini sadto bilang asawa lang sang nagtaliwan nga DILG Secretary Jess Robredo. Matahum man ang pag-alagad niya bilang Bise Presidente bisan pa ginadid-an ini siya sang maayo nga obligasyon ni Presidente Duterte.
On the other hand, kinahanglan man ni VP Leni ang popularidad ni Mayor Isko sa iya baluarte sa Manila kag sa mga kabataan agud magdaug liwat upod sa ila grupo sa oposisyon.
Kag ano ayhan ang isa nila ka tagline sa sining kampanyahanay? Pwede seguro ang “Strong Rule of Law vs Strong Leader” sa away sang oposisyon sa strongman rule ni Presidente Duterte kag sang iya grupo sa PDP-Laban.
Ano abe sa inyo?/PN
