Tricycle, traysikad kag e-tricyle

NAGALUMBAYAG sa bisan diin lang nga dalan. Nagadinaguso sa tagsa ka hapon tubtub sa gab-i. Madamo ang kolorum nga nagabiyahe.

Tion na nga rebyuhon sang syudad ang kahimtangan sang mga tricycle, traysikad kag iban pa nga nagataris sa dalanon nga mismo ang city government ang nagahatag sang prangkisa ukon pahanugot nga sila ang makabiyahe.

Talalupangdon na ang pagbiyahe sang mga e-bike ukon e-tricycle sa mga dalanon, ginagamit nga service kag ginakabig nga kaangay sang tricycle apang masyado ini ka peligroso kag indi dapat pagtugutan nga makataris sa mga dalan nga masaku kag ginakabig nga national highway.

Dapat hugton ang Public Safety and Transportation Management Office ang pagdakop kag pagkumpiskar sang mga e-tricycle nga nagabiyahe ukon nagapatuga-tuga sa mga masaku nga dalan. Dapat may igapasar na nga ordinansa nga indi sila pagtugutan sa paglabay sa mga masaku nga dalan kag dapat magpabilin lang sa barangay road, kaangay sa ginasunod nga ruta sang mga traysikad.

Dapat man dumdumon sang PSTMO nga tsekyaron ang permit sang mga traysikad kon bala na-renew na ukon napabay-an na sang mga tag-iya kag sang ila mga driver nga naga-biyahe.

Talupangdon man nga ang mga traysikad ang nagagamit na sang motorsiklo kag halos daw kaangay na sang tricycle ang ila pagbiyahe apang may limitado lang nga kapasidad.

Dapat may yara na sang pamaagi ang syudad kon paano sila matumod paagi sa pagkategorya, kag dapat bag-uhon ang ordinansa agud nga mapasibu sa pagbag-o man sang panahon kag sa dikta sang pagkinahanglan sa pagpangabuhi.

Ipatudok man sa ila nga dapat istrikto nila nga sundon ang ila ruta kag indi magpasimpalad sa mga magutok nga dalan kag sa national highway bangud peligroso para sa ila kag nagatuga sila sang paghinay sang lakat sang trapiko.

 Lakip man nga hatagan sang liwat nga pagtalupangod ang mga tricycle kon bala rehistrado ini sila, pila ang naka-rehistro kag pila ang kolorum. Madamo sa ila ang nagatuhaw sa dalan kon mag-abot na ang alas 4:00 sang hapon, ukon tayming sa pagpauli sang mga estudyante sa elementarya kag sa hayskol.

Dapat nga imbentaryuhon ang kadamuon sang traysikad kag tricycle, lakip man ang e-tricycle agud makita sang syudad kon ano ang matuod nga dagway sang sini nga sahi sang transportasyon.

Hibaluon kon pila ang ginabiyahe kag pila ang nagapasuni nga ginagamit lang nila bilang ‘private’ ukon ila nga ginahimo nga ‘service.’

Kahibalo kita nga importante man ang serbisyo sang mga traysikad kag tricycle, ilabi na kon gab-i nga wala na sang jeep nga nagabiyahe, apang dapat sila ang rehistrado para sa proteksyon sang mga pasahero.

Nagapanawagan kiya sa city council nga dapat maatipan man sang lubos ang kahimtangan sang tricycle, traysikad kag e-tricycle. Magpasad na sang bag-o nga ordinansa nga nagasibu sa sitwasyon kag proteksyon sang mga pasahero. Ipokus anay ang panulok sa sini nga sahi sang transportasyon kag talupangdon kon paano sila mapasunod sa mga regulasyon.

Katungdanan sang local government kaangay sang Iloilo city government ang magpasad sang ordinansa para sa regulasyon sang tricycle, ttrayskad kag e-tricycle. Kahibalo ang tanan nga syudad ang nagahatag sang prangkisa ukon permit rason nga antes sila hatagan sini ukon renyuhon ang ila permit dapat masiguro nga nagatuman sila sa mga patakaran. ([email protected]/PN)

LEAVE A REPLY

Please enter your comment!
Please enter your name here