‘Wicked sense of humor’ ni Digong

INDI man “offensive” gid ang mga lahog ni Presidente Rodrigo Duterte, sunu kay Ambassador Sung Kim sang Estados Unidos.

“Madamo siya ginpanghambal nga kontrobersyal, ugaling daw okey man lang ini sa mga pumuluyo tungod ang mga ginapanghambal niya indi man tudok sa iya panghuna-huna kay indi man literal ang iya paghangop,” siling sini. 

Sa Iningles, ini ang siling ni Sung Kim: “He says a lot of controversial things publicly. I think people have now come to understand that many of the things he says are not really, he doesn’t mean (it in a literal sense).” 

Ginhambal niya ini sa interbyu sa “The Chiefs” nga ginpa-ere sang Cignal TV sa One News sang gab-i sang Hunyo 17, 2019.

Gindugang ugaling niya: “I actually enjoy meeting with him…He has a pretty wicked (salawayon) sense of humor.”

***

Sining ulihi lang, naglahog naman si Presidente Duterte, kon lahog gid man ato, although ang iban gapati indi ato lahog.

This time, sa tion ini sang “appreciation dinner” sa isa ka bantugon nga hotel sa Manila para sa anay Presidente kag outgoing Speaker of the House Gloria Macapagal-Arroyo.

Pagkatapos nga dayawon si Arroyo nga “a true living icon in Philippine politics”, gayuhom-yuhom siya nga nag-“confess” nga nagpatay siya sang tawo (kon sin-o wala siya nagsiling) para sa nagligad nga Presidente (2001-2010).

“Ginpatay ko sila tungod pensar ko luyag niya ato himuon ko,” siling gani nga nagayumo-yumo man.

Sa matuod, labag sa konsyensya ni Presidente Arroyo ang death penalty. Ginpa-revoke gani sini ang kasuguan nga nagatugot sang death penalty. Isa pa niya nga rason amo nga ang death penalty wala nagpauntat sang mapintas nga mga krimen. Nagdugang pa gani ini!

***

Pila pa ka “lahog” sang Presidente amo ang pag-rape sang isa ka Australian lay minister sang pag-riot sang mga priso sadtong 1989.

Gin-“justify” niya ini sa pagsiling nga indi kuno katingalahan kay matahum ini kag kon natabuan siya, basi nauna pa siya rape sini.

May pila pa ka kaso nga kasubong sini.  Para sa iya natural lang nga lahog ini sang mga lalake. “This is how men talk,” siling niya.

Indi kita kumpormi sa sini nga pahayag sang Presidente. Ang naga-enjoy lang sing rape, bisan sa sugilanon lang, amo mismo ang may luyag mang-rape, nga wala naman sa pang-inu-ino sang kadam-an nga lalake.

Ang matarong nga lalake – kay moral creature man kita kag indi man lang sapat – makonsyensya sa hilimuon nga ini. Kon madamo gani sa mga sapat ang wala gapamilit kon gapamiriphi na ang babaye, ang matarong nga tawo pa ayhan? Ang matarong nga tawo indi luyag angkonon sa pilit ang babaye kundi paagi sa pagpangaluyag tubtub mapasugot ini.

***

Matuod, may madamo nga nagasuporta kay Presidente nga kauyon sa klase sang lahog niya.

Apang ang maglahog nga luyag niya basta lang pamatyon nga wala sing “due process” ang mga suspetsado sa krimen kag gadala sang salot sang droga, daw indi man ini seguro ang rason kon ngaa ginboto siya kag ang iya mga kaalyado sa nagligad nga eleksyon sang Mayo 2019.

In fact, sa isa ka survey sang Social Weather Stations (SWS) sang sini lang nagpahayag sang kahangawa sang mga pumuluyo parti sini.

Ang survey nagsiling nga 78 ka porsyento sang mga Filipino ang nagakahangawa nga basi ang pila nila nga kakilala mangin biktima man sang EJK.

Ang ining survey nagpakita nga nagsaka ang numero sang nagakahangawa halin sa 73 ka porsyento sadtong 2017.

Tubtub subong gani indi pa ma-aprubahan ang pagpabalik sang death penalty sa Kongreso.

In other words, indi manami nga lahog ang padayon nga pinatyanay sa aton sosyedad.

In fact, ginakulbaan kita nga ang ining pinatyanay makadto sa pagbinaslanay kag indi sa pagkinit-anay sa husgado. Nagabalos na karon ang mga kriminal. Daw nagasiling sila nga kon patyon man lang sila bisan ma-surrender na, maayo na lang nga mabalos man sila pamatay.

Mga 6,500 na ang napatay sa gyera sa droga, sunu sa kapulisan, mga 156 naman gani ang nataktak sa mga kapulisan.

Indi kita malipat sa pagtudlo ni Hesukristo: “Ang gakabuhi sa hinganiban mapatay man sa hinganiban.” Sa English pa: “Violence begets violence”. ([email protected]/PN)

LEAVE A REPLY

Please enter your comment!
Please enter your name here