KON WALA nagasabat ukon “silent” lang ang akusado sa akusasyon sa iya, sunu sa aton amigo nga abogado, indi pa ang hwes maka-“conclude” nga “admission of guilt” na niya ini bisan pa sa mabug-at na nga ebidensya sang prosecution.
Dapat makuha gid anay ang iya “assertive” nga sabat sa akusasyon tungod sa iya kinamatarong sa “due process”.
Apang kon indi siya gihapon maghatag sang iya pang-depensa nga sabat sa idalom sang iya “duty to speak”, pwede na siya ma-“estoppel” nga indi na mahatagan sang kinamatarong nga mag-“speak out” pa.
Tungod sini, mapilitan na ang hwes nga maghulog sang iya sentensya, kon tion na nga pamatbatan siya, kon “damning” na gid man ang mga ebidensya sang prosecution kontra sa iya.
Mahimo na ina sang hwes tungod mapensar na sini nga ang “silence” sang akusado isa na ka pag-admitir sang akusasyon sa iya sang prosecution.
***
Lain ugaling ang sitwasyon sa isa ka electoral contest nga ang magahusgar sa imo amo ang ordinaryo nga botante, nga ginabasehan amo lang ang “common sense” ukon sentido komon.
In fact, sang wala pa mauso ang “forensic evidence” amo gid lang man ini ang ginasaligan sang hwes – ang pag-upod sa kinaalam gid lang sang kadam-an nga pumuluyo sandig sa indi na masuay nga “common evidences”.
Sa eleksyon ang mga isyu nagatumod gid lang sa “good governance” kag indi kinahanglan nga hwes gid ang mag-desisyon.
Bastante na nga mahibal-an sang mga pumuluyo ang bagay mahibal-an nila parti sa mga kandidato – kon ano ang pagkatawo nila kag kon sin-o ang mas masaligan sa pagdala sang ila kaayuhan sa pangabuhi kag sa pag-protejer sang ila ginakilala nga mga kinamatarong.
Angot diri, isa sang luyag nila mahibal-an amo kon ano ang masabat sang mga kandidato sa mga akusasyon angot sa ila “honesty and integrity”, isyu sang corruption sa pwesto, ihibalo sa pagdumala kag pagsabat sa problema sang mga pumuluyo, kag ang kasubong pa nga ihibalo nga makahatag kumpyansa sang mga pumuluyo sa pagpatuman nila sang ila mga katungdanan.
***
Partikular sa isyu batok kay BongBong Marcos, sa ila mainit nga isyuhanay ni VP Leni Robredo sa ila pagdalagan sa pagka-Presidente, isa sang pamangkot amo ang: Matuod bala nga “golden age” gid ang sobra 10 ka tuig nga martial law regime sunu sa pagpabugal ni BBM, ukon rehimen ini sang indi mapatawad nga mga torture, disappearance, kag paghingabot kag panglupig sa kinamatarong sang oposisyon kag independent media?
Matuod man bala ang siling sang korte nga wala makabayad si BBM sang iya buhis sadtong 1982-1985?
Matuod bala ang siling niya nga gradwet siya sa kurso nga Economics sa Harvard? Matuod bala nga siya ang “author” sang R.A. 9522, ukon ang Philippine Archipelagic Baseline Law, sunu sa iya claim?
Kon indi matuod ang akusasyon ni VP Leni Robredo, siya gali ang butigon. Ugaling may mga pamatuod si VP Leni sa ining iya akusasyon kay BBM.
***
Sa akusasyon ni VP Leni nga “liar” si BBM, wala sing masabat si BBM, luas lang sa sabat sang iya taghambal nga indi siya luyag sing “negative and hateful campaigning”.
Ang matuod, sa nasiling ta na sa ibabaw, may pamatuod si VP Leni sa ining iya akusasyon batok kay BBM nga indi ma-deny ni BBM.
Indi man magsiling ang taghambal ni BBM nga siya gid lang ang naisgan atakehon sang iya mga kasumpong kag makaluluoy gid kuno siya.
Ang matuod, sunu kay VP Leni, siya ang ginkamasaan sang wala kag tuo nga atake sang mga trolls ni BBM sa ila mga panghikay, pangyaguta, kag binastos nga propaganda.
***
Indi pareho sa kay BBM ang iya mga kasumpong. Wala ini sila nahadlok sabton ang mga “damning” nga mga akusasyon ni Jessica Soho sa iya interbyu.
Gin-admitir ni Pacquiao nga naka-violar man siya sang traffic regulations. Si Lacson nagsabat man sa akusasyon nga kuno nalagyo siya sa kasuguan sa iya kaso angot sa Baleleng massacre. Gin-ako man ni Moreno nga ginbulsa niya ang P50 ka milyon nga excess contribution sa iya kampanya sadtong 2016 tungod wala man sing may nag-claim kag ginbayaran man niya ini sing buhis.
Samtang, si BBM wala iya gana magsabat sa mga akusasyon batok sa iya. Nahibal-an na ninyo seguro kon ngaa./PN
