Friday, February 23, 2018


Madamo sang mga naga-obserbar lamang ang indi komporme sa polisiya nga deployment ban sa pungsod Kuwait sang Duterte administration.

Liwat nga nagtuhaw, kaangay sang mga uhong sa tion nga nagapangilat, ang magkatuhay nga panan-awan angut sa pahayag ni Presidente Rodrigo Duterte.

Indi mapunggan ang mga negatibo nga paglantaw kaangay sang punto nga madulaan sang palangabuhian ang mga nagasandig sang ila palangitan-an sa pagtrabaho sa Kuwait. May nagasinggitan nga dapat hatagan sang alternatibo nga palangabuhian, may nagasiling nga dapat sabton sang gobyerno ang ila kahul-anan bangod nadulaan sila sang higayon nga makaganar.

Ang tanan nakita na sang gobyerno, ilabi na kon paano ang ila mangin kahimtangan pagkatapos nga ipatuman ang polisiya. Naghatag man sang opsyon ang gobyerno kag ila lang ginganyat ang luyag nga magpauli sa Pilipinas. Gingastohan sang pungsod ang tanan nila nga kinahanglanon agud nga makapauli kag hatagan sang palangabuhian agud nga indi magutoman.

Ginabulobanta nga kapin sa dos mil ka mga overseas Filipino workers ang nagsabat sa panawagan sang gobyerno sa pagpauli sa pungsod.

Masobra naman sa 250 mil ka mga Filipino ang nagatrabaho karon sa pungsod Kuwait.

Gin-athag naman sang gobyerno kon ano ang kahulugan sang deployment ban bangod nga may yara sang luyag nga magpabilin sa ila trabaho ilabi na nga mga mabuot ang ila mga amo kag maswerte ang ila pagpang-empleyo.

Ginatugotan man ang mga nagpauli diri kag nagbakasyon nga makabalik sa ila trabaho apang ang ginadumilian lamang amo mga wala pa nakatrabaho nga luyag magtrabaho sa Kuwait ilabi na nga matupa sa bag-o nga employer nga wala pa sang track record.

Matuod nga may epekto nga matuga ang ini nga polisiya apang dapat nga ipabatyag sa pungsod Kuwait nga dapat man nila amligan ang mga nagatrabaho sa ila pungsod.

Ginapabugtaw lamang ang pungsod Kuwait nga kita nga mga Filipino indi lamang ordinaryo nga mga trabahador kundi dapat kabigon man bilang mga tawo nga may dignidad kag indi pagkabigon kaangay sang mga sapat.

Luyag lang tandugon sang Duterte administration ang patakaran sang Kuwait sa paghatag sang sensitibo nga pagtalupangod sa mga Filipino nga mga nagatrabaho sa pungsod.

Makabig ini nga pampamuklat sa ila mga mata kag pampakwa sang ila atensyon nga dapat hatagan man sag importansya ang mga Filipino.

Kon ipatuman sang lubos ang total deployment ban kag hatagan sang opsyon ang mga madulaan sang trabaho didto kaangay sang livelihood program sa Pilipinas ukon trabaho sa iban naman nga mga pungsod, posible nga daku ang madula sa Kuwait kag maapektohan ang lakat sang ila ekonomiya.

Mahimo nga makamarasmas man ang Kuwait nga dapat amligan ang ila mga mamumugon, hatagan sang patas nga pagtratar kag solusyunan ang mga problema nga nagaluntad ilabi na kon may mga OFW nga ginasakit, gina-maltratar kag kon ano pa nga malain nga kapalaran ang ila ginaagunto.

Luyag lang sang gobyerno sang Pilipinas nga ligwaton sang pungsod Kuwait ang ila patakaran, kag dapat mas sensitibo sila sa kahimtangan sang mga nagatrabaho sa ila pungsod kaangay sang mga OFW./PB

LEAVE A REPLY

Please enter your comment!
Please enter your name here