Dugang nga mga santos

MAPAG-ON ang pagtuo. Nagsakripisyo paagi sa akto para sa isig-kapareho. Ginkilala sang simbahan sang Romano Katoliko ang ila pagkamatuod nga kristiyano.

Sa sini nga adlaw sang Domingo, Oktubre 13, 2019, didto sa St. Peter’s Square sa Vatican City hiwaton ang pagdeklarar sa dugang nga lima ka mga tumuluo nga mangin masunod nga mga santos.

Madugang sa listahan ang lima sa 893 ka una na nga nadeklarar nga santos ni Pope Francis umpisa nga nangin Santo Papa siya sadtong 2013.

Nakasab-it karon ang trapal nga may dagway sang lima ka mga bag-o nga santos nga hingadlan ni Pope Francis kag ini ang nag-adorno na sa panampad sang St. Peter’s Basilica.

Kabahin sa lima ka igadeklarar nga mangin santos sanday Cardinal John Henry Newman sang England, ang bantugon nga maalam kag theologian nga ginbunyagan nga Angelikano apang nagdesisyon nga batunon ang Simbahan Katoliko sa edad nga 45-anyos kag nangin pari kag naghimakas para sa kinamatarong sang mga Katoliko sa England.

Kaupod sini ang apat ka babaye nga lunsay mga madre nga igadeklarar man nga mga santos, kaangay kay Sister Irma Dulce sang Brazil nga napatay sang tuig 1992. Ang iya canonization ang makabig nga ikatatlo sa pinakadasig sa maragtas. Ginkilala sa Nobel Peace Prize sadtong 1988 ang iya serbisyo kag ginakumparar siya sang madamo kay Mother Theresa sang Calcutta.

Samtang, si Sister Giuseppina Vannini sang Italy ang co-founder sang Congregation of the Daughters of St. Camillus kag kilala sa iya pagkamaluluy-on para sa mga nagamasakit, sa mga pigado kag sa mga napriso.

Lakip man diri si Sister Mariam Thresia Chiramel sang India nga nagpasad sang Congregation of the Sisters of the Holy Family sa Thrissur kag nagdedikar sa pagserbe sa mga kabus sa pangabuhi. May yara ini siya sang stigmata ukon patimaan sang Passion of the Lord.

Kaangay ni Chiramel, si Sister Marguerite Bays sang Switzerland ang may yara man sang stigmata. Isa siya ka Swiss Franciscan tertiary nga nagdedikar sang iya kabuhi sa apostolate kag sa catechesis.

Pinakadamo nga gindeklarar nga santos ni Pope Francis sadtong Mayo 12, 2013 nga ginalakipan nanday St. Antonio Primaldo kag 812 ka iban pa nga ginatawag Martyrs of Otranto nga mga pumuluyo sang Salentine City sa Otranto, Italy nga ginpamatay sadtong Agosto 14, 1480 sang ang syudad napukan sa kamot sang pwersa sang Ottoman sa idalom ni Gedik Ahmed Pasha.

Sunod nga pinakadamo nga gindeklarar nga santos natabu sadtong Oktubre 15, 2017 nga ginpangunahan ni St. Andre de Soveral kag 29 ka iba pa nga ginatawag Martyrs of Natal. Sila nga 30 ka Brazilian Roman Catholic nga mga indibidwal, duha sa ila ang mga pari, ginpamatay sa Northern Brazil paagi sa pagmasaker sang daku nga grupo nga ginapamunuan sang mga Dutch Calvinists.

Magluwas sa ila, madamo pa sang iban nga kilala nga mga gindeklarar nga mga santos sa sini nga panahon ni Pope Francis. Ginalakipan ini nanday Pope John XXIII sadtong Abril 27, 2014; Pope John Paul II sadtong Abril 27, 2014: Teresa of Calcutta sadtong Setyembre 4, 2016; Pope Paul VI sadtong Oktubre 14, 2018; kag, madamo nga iban pa. ([email protected]/PN)

LEAVE A REPLY

Please enter your comment!
Please enter your name here