Indi na magpakatig-a pa

GINPASULABI sila sa malawig nga panahon. Gin-ili-ili sila sa madugay na nga dinag-on. Nagpanginpulos sila kag nagpangabuhi sa kilid sang dalan.

Nahangpan sang tanan ang kahimtangan sang mga sidewalk vendors. Nakita sang tanan nga maapektuhan ang ila palangabuhian. Nagakahangawa sila sa kon ano ang ila madangatan sa palaabuton.

Masakit man batyagon apang makapamag-an sa balatyagon kon hangpon ang sitwasyon. Dapat mangin masinulundon sila sa kasuguan nga dapat hugot nga ginpatuman sadto pa man. Nangin halog lang ang syudad para sa ila kag wala sila gintandog, ginhangop sila, kag nagsagsag pa sila.

Ginpasulabi ang mga sidewalk vendor sa malawig nga panahon. Ginhatagan pa sila sadto sang libre kag palareho nga desinyo sang kiosko. Ginkilala ang ila espasyo sa kilid sang dalan bisan supak sa kasuguan.

Gin-ili-ili sila sang gobyerno sang syudad paagi sa pagtugot sa ila nga makapalapad sang ila balaligyaan sa tagsa ka panahon sang paskwa, ilabi na sa pag-umpisa Disyembre 1 tubtub 31.

Dinag-on na ang pagpanginpulos nila sa kalye. Daku na nga pribilihiyo ang ginhatag sang gobyerno para sila mabuhi nga hilway sa buhis. Nagnegosyo sila nga wala sang renta sa ila pwesto. Nagbenta sila nga wala naga-isyu sang resibo.

Kahibalo sila nga indi kinamatarong, kundi prihibiliyo lamang, ang pagtugot sa ila nga makabaligya sa sidewalk. Dapat paminsaron nila nga wala sila sang kinamatarong nga magtenir dira kag wala sila nagapanag-iya bisan isa ka metro kwadrado sang dalan.

Maathag nga sadto pa sang 1990 may yara na kita sang ordinansa nga nagamulta sang 1,000 pesos sa makalapas sini kag ang indi makasarang magbayad sang 1,000 pesos ang mahimo mapriso sang tubtub anum ka bulan.

Antes pa man nagmandu si Presidente Rodrigo Duterte nga hawanan sa mga sablag ang dalan kag ibalik sa publiko ang kinamatarong sa paggamit sini kag indi pag-itugot nga gamiton sa pribado nga katuyuan, maathag ang ordinansa sang syudad sang Iloilo.

“City Ordinance No. 14-1990 provides that sidewalks, plazas and public places are public properties and to be used solely for passage and public use and should be free of access to the public. It is prohibited to use or to construct any structure, stalls or kiosks on the city sidewalks, public places or plazas for business or commercial purposes except during fiesta celebrations, agricultural and industrial fairs or expositions wherein such use is allowed only upon the approval of the City Council through a resolution.”

Tama na ang pagka-emosyunal. Untat na sa paghibi-hibi. Ihatag sa pumuluyo ang ila bahin nga madugay na ninyo nga napuslan.

Kaugalingon lang ninyo ang inyo ginapaminsar. Hatag man kamo sang pasunaid sa mga nagalabay sa dalan nga wala na sang maagyan bangud okupado ninyo kag nagabalabag kamo sa sidewalk.

Ginatan-ay na sang city government ang tanan. Nagpangita sang lugar para sa indi apang damo kamo kondisyunes. Ginpainan kamo sang tag-singko mil pesos nga bulig pinansyal apang hikay pa kamo. Ginhatagan kamo sang higayon nga makahanas para sa livelihood training apang wala kamo sang gana.

Ginahumlad na sang syudad ang iya palad sa pag-atipan sa inyo apang luyag pa ninyo nga angkabon kutob sa siko.

Indi na kamo magpakatig-a pa, dapat lang nga sundon ninyo ang mandu kag ang ordinansa. ([email protected]/PN)

LEAVE A REPLY

Please enter your comment!
Please enter your name here