Mapag-on ang kamatuoran

NAGAPANAGANG sa mga akusasyon. Nagapanindugan sa kamatuoran. Nagapakigbatu para sa matinlo nga ngalan.

Nabutang karon sa kontrobersiya si Romeo Caesar Manikan Jr., ang Iloilo City Local Civil Registrar, matapos nga nagtuhaw ang mga akusasyon tuhoy sa peke nga dokumento sa kasal nga nagresulta sa depektuso nga marriage certificate.

Una nga naglanog ang impormasyon sang gin-anunsyo ni Mayor Jerry Treñas sa ginhiwat sadto nga flag-raising ceremony nga may reklamo siya nga nabaton nga may nagapanukot sang kapin sa otso mil pesos agud nga mangin madasig ang proseso sang pagpakasal kag indi na kinahanglan pa magtanum sang puno sang kahoy ang magkahagugma antes sila kaslon, nga isa sa mga resikitos sa pagpakasal.

Ginsundan ini sang pahayag nga may 180 ka kasal nga depektuso kag ang mga ginkasal wala nakakwa sang ila certificate of marriage bangud depektuso ang kasal.

Naglipas ang panahon apang wala sang tagreklamo nga nagtuhaw, bisan isa sa 180 ka mga ginapasuni apektado sang peke nga dokumento.

Ginmanduan ang City Legal Office nga magpangusisa kag ginpalab-ot sa National Bureau of Investigation 6 ang reklamo tubtub nga ginpadulungan si Manikan sa iya opisina kag ginsundan sang pagserbe sa iya sang subpoena agud nga magsabat sa mga akusasyon.

Malayo na ang nadangatan sang akusasyon. Madamo na sang dughan ang napilasan. Pila na ka luha ang nag-ilig sa guya sang mga nagakasubo kag nagakahangawa apang ang akusasyon indi sa gihapon maathag kon ano kag kon sin-o ang nagareklamo.

Bangud wala sang ginatago, bitbit ni Manikan ang kamatuoran, kaupod sang iya abogado nga si Atty. Raleigh Manikan, ila ginpadulungan ang NBI-6 kag namangkot kon ano nga akusasyon ang ila pagasabton. Wala sila ginhatagan sang kopya sang reklamo, wala sila nakahibalo kon ano ang reklamo kag kon kanday sin-o ang nagareklamo.

Ginkwestyon nila kon yara sa hurisdiskyon sang NBI ang pag-usisa sa sini nga reklamo. Ginbalabagan nila ang mandu nga magdala si Manikan sang dokumento gikan sa iya opisina angot sa alegasyon sang mga depektuso nga kasal bangud sa pagpati nga makalapas siya sa Data Privacy Act of 2012. Indi niya mahimo nga bitbiton ang mga dokumento gikan sa iya opisina nga wala sang mandu gikan sa korte.

Natingala kita kon ngaa si Manikan ang ginatarget sa imbestigasyon kon nakahibalo man si City Legal Officer Edgardo Gil nga may tuhay nga persona nga amo ang nagpatigayon sang depektuso nga kasal. Gintumod sini si “Judge Artuz” nga gin-terminate sa hudikatura sadtong 2017.

Kon husto ang lantaw sang City Legal Office sa sitwasyon, dapat ginpatawag ang natungdan ukon ginkasuhan. Dapat may klaro nga tagreklamo kag may mga sworn affidavit ukon complaint affidavit nga mabasehan agud masabat sang gina-akusar.

Maathag man suno sa Philippine Statistics Authority 6 nga ministerial ang katungdanan sang Local Civil Registrar kag indi nila makwestyon kon sin-o ang solemnizing officer sa ginpasa sa ila nga dokumento.

Dapat ipatawag ang mga tagreklamo agud matudlo nila kon paano sila natuntohan ukon sin-o ang nagtunto sa ila agud matapos na ang tinunto nga istorya.

Ginaabaga sang nagaakusar ang kabug-at sang alegasyon, dapat ipakita ang pruweba kag panindugan ang akusasyon.

Magapabilin nga mabakod ang tindog sang kamatuoran apisar pa nga nagadinaludo ang kabutigan.([email protected]/PN)

LEAVE A REPLY

Please enter your comment!
Please enter your name here