PATAY ang demokrasya. Ini ang masami nga ginasinggitan sang mga nagapangatubang sang asunto, ilabi na sang mga yara sa oposisyon. Ila nga ginapasibangdan ang administrasyon nga amo ang nagapadihot sa ila nadangatan.
Nangin masami nga ginahinambit ang ini nga tinaga sang mga luyag magpangita sang kaapin sa ila nadangatan bangud sa paghimo sang mga akto nga supak sa kasuguan.
Magansal pamatian bangud ginabasol kag ginatudlo nila ang administrasyon sa ila nadangatan, kaangay lamang nga ang karon nga administrasyon amo ang naghimo sang paagi agud sila ang maduktan sang kaso.
Sadtong ginkasuhan si Senador Leila de Lima angot sa ilegal nga druga kag ginpriso bangud diri, ang ila ginasinggitan nga ‘patay ang demokrasya’ bangud nga wala nagpabor sa ila ang desisyon sang korte.
Ginsundan pa gid ini sang ginapangatubang nga kaso ni Senador Antonio Trillanes IV nga may kaangay man nga singgitan nga ginapigos, gina-ipit kag ginatuyo siya nga pabudlayan sang administrasyon.
Madamo na sang pahayag ang nabatian, madamo sang paathag ang ila gin-uyang apang ang korte amo ang nagadesisyon sang tanan nga mga kaso nga sa ila ginatugyan.
Naglipas ang pila ka mga hitabu, pila ka sentimento kag pila ka argumento ang napautwas batok sa gobyerno. Madamo man sang nagpahayag sa kon ano ang husto kag nagakadapat.
Nag-init liwat ang sugilanon sang nabutang sa kontrobersiya si Maria Ressa sang Rappler nga kilala nga kritiko sang Duterte Administration. Ginkasuhan ang iya kompaniya bangud sa mga paglapas sa kasuguan sa buhis. Ginapasuni nga indi husto ang ila deklarasyon kag ginabayad nga buhis sa gobyerno.
Nagtahaw ang init sang sitwasyon, nagkulpa ang nagdaludo nga emosyon kag nalipatan sa paglipas sang panahon.
Sa tunga sang mabugnaw nga bulan sang Pebrero, liwat nga nag-init ang ilig sang mga balita natuhoy sa pagdakop sang mga katapo sang National Bureau of Investigation kag Maria Ressa angot sa kaso nga libelo nga ginpasaka sa iya sang pribado nga indibidwal, ang negosyante nga si Wilfredo Keng.
Nagasinggitan na naman sila nga ‘patay ang demokrasya.’
Maathag man nga ang libelous article ang ginbalhag nila sadtong 2012 kag gin-update kag liwat nga ginbalhag sang 2014, pila ka tuig antes napilian bilang presidente si Rodrigo Duterte.
Ginbasol naman nila ang administrasyon sa kasaypanan nga ila nabuhat. Kuntani wala sila sadto nagpatu-patu sang sugilanon sa iban nga tawo agud nga wala sila sang risgo nga makasuhan.
Padayon ang kahilwayan sa pagpahayag kag pagpalayag. Wala ini gintublag sang gobyerno kag mapatuod diri nga wala naga-untat ang impormasyon nga ginabantala ni Maria Ressa.
Paano niya masiling ang iya kaso makahatag sang huol kag katagam sa mga katapo sang media? Ang solusyon sina agud makalikaw sa kaso amo nga magtuon kag siguruhon ang ginasulat. Indi magpahabyog kag indi magpalagpat.
Kon makabuhat sang sala ang sin-o man, dapat nga manabat sa kasuguan kag indi luwas diri bisan ang katapo sang media.
Kon ang oposisyon ang makasuhan, patay ang demokrasya. Kon magpabor sa ila, buhi ang demokrasya.
Makatalagam ang mga mabaris sa sosyudad kay ila ginahimo nga maranhig ang demokrasya. (bertladera@gmail.com/PN)
