INDI NA bag-o sa pagdumala sa syudad sang Iloilo si Mayor Jerry Treñas. Natapos niya sadto ang bug-os niya nga termino antes nangin kongresista, nag-adjust sa iya trabaho sa Kongreso kag pagkatapos sini, liwat siya nga magapangalagad bilang alkalde sang syudad.
Apisar sang iya inagihan sadto sa iya pagpangalagad bilang alkalde kag bilang kongresista, siya mismo ang nanibag-o sa klima, kultura kag panggawi nga nagakatabu sa city hall.
Gilayon niya nga ginhimulsuhan ang mga empleyado sa city hall. Ginpadulungan niya ang tagsa ka mga departamento kag ginkumusta ang mga empleyado, luyag niya nga ipabatyag sa ila nga siya ang bag-o nga alkalde, ang nagpanumbalik nga alkalde kag ang pagpasalamat sa mga empleyado sa pagtib-ong sa iya kandidatura agud liwat nga makadumala sa syudad.
Gintuad sini nga tuman ka daku sang responsibilidad nga nagatungtong sa iya abaga bangud mas madamo na ang pumuluyo, mas nag-uswag ang syudad kag dapat mangin mahinalungon siya sa paghimo sang desisyon tuhoy sa mangin direksyon sang city government.
Apang, indi masikway ang kamatuoran nga kinahanglan nga maglabay sa masakit, makapoy, kag malawig nga proseso agud nga maagom ang bag-o nga dagway. Kinahanglan ang pagpanghiluno, ang pag-ilis sang panit ukon sang alukaba, antes mangin mabakod, mangin maanyag, mangin makagalanyat kag mangin lubos ang kinaiya.
Matapos madeklarar ang iya kadalag-an, ginpasalig sini ang pag-level up sang syudad sang Iloilo. Luyag sini nga mabatak ang kahimtangan gikan sa karon nga sitwasyon paagi sa pagdugang sang mga istruktura kag serbisyo nga wala napasad sa syudad.
Madamo siya sang nakita nga dapat pun-an, mga kulang nga dapat idugang agud mas mapabakod ang serbisyo nga ginahatag sa mga pumuluyo.
Bangud sa pasalig nga “level-up”, may mga empleyado gid nga maapektuhan, may mga masalapay sa ila pulungkuan kag may makakas sa ila nga ginahamtangan.
Matukal ang daan nga panit ukon alukaba, mahulog sa duta kag madunot. May mga nasampulan na kag may lauman pa gid sa palaabuton.
Madamo sang matabu bangud nagpasalig si Mayor Jerry Treñas nga iya lantawon kag hatagan sang hustisya ang nagkalahinabu sadtong panahon sang kampanya kag adlaw sang eleksyon.
Indi sini malipatan ang mga tawo nga nagtraidor sa iya, mga tawo nga iya ginsaligan sadto apang nagligwat sa ila panindugan sadtong panahon sang kampanya kag siya ang ginluiban.
Indi niya malipatan ang masakit nga ginhimo sa iya. Magahimo siya sang tikang agud ipatilaw sa mga traidor ang kasakit nga iya naaguman.
Sa karon, nagahiluno pa si Mayor Jerry Treñas. Nagatipon pa siya sang pwersa kag nagalantaw kon ano ang angay niya nga mangin dagway sa atubang sang iya mga abyan kag tagsakdag, kag kon man ang iya mangin dagway sa mata sa iya mga kaaway.
Lauman nga pagkatapos sang iya paghiluno, sa tion nga mahukas na ang daan nga alukaba, makita naton ang mas mabakod, maduagon, kag mas episyente sini nga dagway para sa mas pa nga pag-uswag sang syudad, kag indi para sa mga kasumpong nga masabad.
Ginasigahum naton nga kadungan sang pag-ilis sini sang iya alukaba, malab-ot man ang handom nga pag-level-up sang syudad sang Iloilo. (bertladera@gmail.com/PN)
