Nagpanirado ang mga negosyo

NAGANYAT nga magnegosyo sa syudad sang Iloilo. Nagalaum nga mangin kabahin sang mapagsik nga ekonomiya. Nagtuyo nga makatan-ay sang tuhay nga mga produkto kag serbisyo sa mga Ilonggo.

Madamo sang mga negosyante ang nasilaw sa pag-inggat sang syudad. Nagbanaag ang kaanyag kag higayon sa mga pamantalaan kag sa social media. Wala sang mga negosyante ang nakapamalibad sa pagpaminsar nga magpasad sang negosyo sa syudad sang Iloilo kag magsakay sa nagahagunos sini nga ekonomiya.

Kadamuan sa mga negosyante ang naila sa ila nabasa kag nakita sa mga pamantalaan, sa social media kag sa sugid sang iban man nga kaangay nila nga negosyante nga naganyat sa posibilidad nga makaganar kag makapasanyog sang ila negosyo sa syudad sang Iloilo.

Nagpangita sila sang lugar nga mahimo pahamtangan sang ila negosyo. Ginpangita ang maayo nga pwesto nga makaganyat sa mga kliyente ukon mga kustomer. Ginkasaran ang sukot nga arkila, bisan ano pa ka mahal, sa pagpati nga malabawan ini sang ila mangin benta kag masapar sang ila matag-adlaw nga kita ang ila mangin galastuhan kaangay sang sweldo, renta sa pwesto, kuryente kag iban pa.

Mapagsik ang ila pamatyag sa pagsugod sang ila negosyo apang nagaluya samtang nagalipas ang binulan bangud nagatuhaw na ang problema sa kon paano nila mabatak ang ila benta agud nga masapar ang ila mga balayran.

Nadula ang isa ka negosyo nga nagarenta sa isa man ka Spanish-style building sa dalan Diversion road. Ginapasuni nga ang problema nila amo nga indi nila mataklad ang target nga benta, bisan makapatas lamang kuntani sa ila bulanan nga galastuhan sa pag-operate sang negosyo. Kabus ang ila benta sa ila mga balayran nga obligado nila nga bayaran.

Manirado man ang grocery store nga nagarenta sa sulod sang hotel sa city proper bangud sa ila problema nga kabus man ang benta sa ila bulanan nga balayran.

Bisan pa ang bantog nga pizza store sa sulod sang isa ka daku nga mall sa Diversion road ang nagpanirado na kag natabunan na sang trapal ang pwesto nga madugay na nila gina-okupar – umpisa pa sa pagbukas sang mall sadto.

Palaligban man sang isa ka bantog nga hotel, nga mataas kag moderno, sa distrito sang Mandurriao kon paano sila makabatak sa ila galastuhan sa tagsa ka bulan. Ginasustenir nila ang patas nga kita bangud nga bisan pa halos 90 percent ang ila occupancy rate sa kada bulan apang ang ila balayran sa kuryente ang nagabutong sa ila nga income.

Kon padalman ang ila problema, makita sa punta nga ini lunsay bangud sa mataas nga balor sang kuryente nga ila ginabayaran. Nabudlayan sila nga mataklad ang target nga benta bangud halos katunga ukon mayoriya sang ila kagastuhanan ang ginapain para lang sa balayran sa kuryente.

Tion na nga dapat balikdon sang gobyerno sang syudad ang ini nga problema bangud bisan ano pa ka ganyat naton sang mga negosyante kon ginalipong sila sang mahal nga balor sang kuryente, indi sila makapadayon sa ila negosyo.

Dapat may klaro nga direksyon ang syudad sa pagtukib sa pila pa ka hibubun-ot sang mga negosyante agud matumod ang ugat sang problema kag mahatagan sang atensyon kag solusyon.

Indi na kita maghulat nga mangin kalong nga kahon ang madamo kag matag-as nga mga building sa syudad sang Iloilo. ([email protected]/PN)

LEAVE A REPLY

Please enter your comment!
Please enter your name here