Pasundayag ang ginaamag

ANG highlight sang Dinagyang Festival sa tagsa ka tuig kaangay sang matam-is nga kalamay, ini ang ginaamag sang nagakaganyat nga mga subay. Bisan ano mo ka tago tultulon sang mga subay, magahimo sang ligwa agud nga ila matilawan kag madala ang ila ginapuntirya.

Indi matabog ang mga luyag magpakigbahin sa sini nga selebrasyon. May yara sang magabuylog sa kinasadya, may yara man sang magapamentaha agud nga maduso nila ang ila tagsa ka kawsa.

Kahibalo ang tanan nga madamo sang tumalan-aw sa pagpasundayag sang tagsa ka tribu nga nagapasakop sa kompetisyon. Kahibalo ang tanan nga nagahilapit na ang eleksyon. Ang okasyon isa ka angay nga higayon agud nga makapakilala sa tawo, sa masangkad nga tumalan-aw, kag makapahibalo sang tinutuyo para sa palaabuton nga piniliay.

Kada tuig, mainit ang Dinagyang sa mata sang mga kandidato ilabi na kon ang tion nagasibu sa palaabuton nga eleksyon. Nagapangita sila sang paagi kon maano makasakay sa kabantog sang selebrasyon.

Maalam ang mga kandidato. Indi sila maggasto nga wala sang balik sa pagpahamot sa ila ngalan. Realidad ini nga indi mabali, indi madula kag indi mabalabagan.

Apang, ibalik naton sa katuyuan kon ngaa may yara sang tuigan nga Dinagyang Festival. Ini amo ang pagselebrar sang mga Ilonggo kag amo ang paagi sa pagpasidungog sa Señor Santo Niño.

Ginhimakasan ini sang tanan nga mangin bantugon kag kilalahon sa bug-os nga kalibutan. Nagbunga ang paghimakas rason nga gindugukan sang mga dignitaryo kag mga turista gikan sa luwas sang pungsod.

Wala sang problema kon ano amumahon ang mga bisita. Hatagan naton sila sang angay nga pagpakilala sa mga tumalan-aw. Ihatag naton sa ila ang nagakadapat nga kurtesiya. Apang likawan naton nga sila ang tugutan nga makapamulong-pulong sang malawig bangud indi ini angay kag nagakadapat sa okasyon.

Tandaan naton nga ang selebrasyon ginadugukan sang tanan agud nga maglantaw sa mga pasundayag. Wala nagkadto ang tawo agud nga magpamati sa mga litanya sang mga pulitiko.

Palihog, indi ninyo paghamua ang aton ginhanda para sa tanan agud nga indi mapan-os kag indi mapuslan.

Nagabaylo ang liderato sa syudad sang Iloilo. May mga naagyan nga mga hitabu, may mga natun-an nga ginalikawan nga liwat nga matabu.

Apisar sang pagbulubaylo sang liderato, nagapabilin ang kabantugon sang Dinagyang bangud wala ini nagaupod sa kadalag-an sang pulitiko ukon kandidto. Nagapag-on ini sa tagsa ka paghimakas sang mga Ilonggo. Indi ini angay nga intrahan sang pulitika ukon gamiton para sa pamulitika.

Makahaladlok ang higayon nga mangin “intermission number” na lamang ang pagpasundayag sang kada tribu nga nagapasakop. Sila ang magalingaw matapos ang malawig nga pamulong-pulong sang mga kandidato.

Indi ini political rally. Selebrasyon ini sang mga Ilonggo kag ang ginahatagan sang pagpadungog indi ang nagadumala sa city hall kundi ang patron sang selebrasyon nga si Señor Santo Niño.

Tandaan lang naton nga ang mga tawo nagakadto sa venue bangud sa pasundayag sila ang nagaamag./PN

LEAVE A REPLY

Please enter your comment!
Please enter your name here