Programa sa relokasyon

NANGIN mainit ang diskurso sa konseho sang syudad sang Iloilo angot sa ginduso nga resolusyon ni Councilor Jay Treñas nga amo ang tserman sang komite sang urban poor nga nagahingyo sa Iloilo City Urban Poor Affairs Office nga buligan ang 29 ka pamilya nga pahalinon sang tag-iya sang pribado nga lote sa Zone 5, Barangay Jereos, La Paz.

Ginapanugyan ni Councilor Plaridel Nava sa iya kaangay nga konsehal nga si Treñas nga indi na pag-ipaagi sa publisidad ang paghatag sang bulig sa mga natungdan paagi sa pagpasar sang resolusyon bangud mahimo man si Treñas magdiretso sa ICUPAO agud nga ipalab-ot ang ila nga kabalaka.

Kon matuod nga sensiro si Councilor Jay Treñas sa pagbulig sa ila, dapat ginbuligan niya paagi sa paggiya sa ila kag wala na sila gingamit para ipahibalo sa publiko nga nagahulag man ang iya opisina para sa ila kaayuhan.

Matuod gid man nga dapat unahon solbar sang tag-iya sang duta ang problema angot sa mga tawo nga nagapuyo sa iya lote kag sundon ang ginasaad sang kasuguan kon paano sila mahatagan sang ila alternatibo nga pagapuy-an.

Husto ang punto ni Councilor Nava nga indi patas para sa gobyerno sang syudad nga abagahon ang tanan nga problema angot diri bangud nga madamo sang mga nagapuyo sa mga pribado nga lote kag maputo ang gobyerno kon tanan sila akomodahon kag hatagan sang libre. Dapat man tandaan nga sa listahan sang mga benepisyaryo, mas may nakauna pa sa ila.

Mas nagakadapat siguro nga tun-an ni Councilor Jay Treñas ang palaabuton nga mga problema angot sa madasig nga pagtin-ad sang syudad kag maghimo siya sang nagakaangay nga mga tikang agud nga makahatag siya sang solusyon para sa maapektuhan sang padayon nga urbanisasyon.

Sa subong pa lang dapat nakita na ang mangin problema sa pagdugok sang mga trabahador sa kabanwahan sang probinsya kag gikan sa iban nga mga probinsya nga magapadulong sa syudad bangud sa madamo nga oportunidad nga sila ang makatrabaho. Kon madugayan sila, makapasad sang pamilya, sila ang magapangita sang ila paga-istaran kag matentar nga magrenta sa mga balay sa palibot sang syudad kag kon indi masiplatan posible magatindog man ang ila mga hayob-hayob.

Mgadamo sila kag mangin potensyal nga problema sa palaabuton. Gani sa karon pa lang dapat may maathag na nga programa ang syudad kon paano mahatagan sang solusyon ang ini nga palaligban nga nagakamang na sa sini nga mga tinion, nagapangalapkap na sa ugsaran sang syudad.

Dapat tuntan na sang tserman sang komite para sa urban poor kon paano iplastar ang programa, kon diin dapat ipahamtang ang dugang nga relocation site, kon ano nga sahi sang pabalay ang pagatukuron agud nga maakomodar ang ila kadamuon.

Nausisa na bala kon pila ang kabug-usan nga pamilya nga apektado sang igapatuman nga mga proyekto? Nalantaw bala kon ano nga mga proyekto ang makaapekto sa mga panimalay kag kon sa diin ini nahamtang?

Likawan ang temprano nga pamulitika kag ipakita ang ikasangkol sa pagsolbar sa problema.

Ipalastar ang programa sa relokasyon. (bertladera@gmail.com/PN)

LEAVE A REPLY

Please enter your comment!
Please enter your name here