Rebyuhon ang K-12 Program

GINADUSO sa Kamara ang pag-rebyu sang K-12 program sang gobyerno nga ginapatuman sang Department of Education. Luyag lamang nga hibaluon kon ano na ang kahimtangan sini kag kon bala nalab-ot ang mga ginatuyo sadto nga kaayuhan nga ginalauman nga maagom sa pagpatuman sang sini nga programa.

Mas nagakaangay nga talupangdon ang pagpatuman sang Republic Act No. 10533 ukon ang Enhanced Basic Education Act of 2013 agud nga mabalikdan man kon diin na kita kutob kag kon ano na kalayo sang aton natikang.

Kahibalo ang tanan nga ang K-12 ukon ang 12-year basic education program nagalakip sang dugang nga duha ka tuig sang senior high school.

Ginpatuman ini sang kongreso kag sang Aquino administration nga palawigon ang basic education program sadtong 2012-2013 nga wala pa masolbar ang tuigan nga problema sa kakulang sang mga manunudlo, mga libro, mga pulungkuan, mga lamesa kag iban pa nga mga suplay, mga hulot-klasehan, lakip ang funding kag support personnel.

Indi na kita bag-o sa sini nga problema sa aton public school system nga masami ginakulang bisan pa nga padayon nga ginadugangan ang badyet para sa edukasyon bangud man sa kamatuoran nga nagadamo man ang numero sang mga bumulutho kaad tuig kag nagakinahanglan sila sang dugang nga mga serbisyo.

Kahibalo man kita nga ang pasalig sadto sang gobyerno nga gilayon makakita sang trabaho ang mga gradwado sang K-12 program, ilabi na ang mga nagpili nga mahanas sa technical-vocational field kag sports and arts, nga indi na kinahanglan pa nga magkolehiyo.

Apang, may mga gradwado na kag madamo sa ila ang wala sa gihapon sang trabaho kag nabudlayan nga makakita sang trabaho. Kon nabudlayan ang mga gradwado sa kolehiyo nga makasulod sa obra, paano pa ayhan ang mga kabus ang  diploma?

Nagapanindugan ang Department of Education nga temprano pa nga husgaran ang K-12 program bangud pila pa lang ka batch ang nakatapos. Luyag nila nga makumpleto ang cycle gikan sa kindergarten tubtub sa Grade 12 antes makahimo sang lubos nga pag-ihibalo kon ano ang kahimtangan sang programa.

Apang, indi man kita luyag nga husgaran ini kundi aton lang nga hibaluon kon ano na ang kahimtangan sang programa. Indi man kinahanglan nga hulaton ang bilog nga cycle antes kita makatalupangod sa dalagan sang programa kon epektibo ukon kon may diperensya, kag wala nagakahulugan nga may ligwaton gilayon kundi may yara lang sang dapat nga pat-inan kag hatagan sang pagtalupangod.

Dapat man nga sundon sang mga buluthuan ang sitwasyon sang ila mga gradwado paagi sa pagpakig-angot sa ila kon may trabaho na sila, kon wala pa sila gana mag-obra, kon nagatuyo nga magpadayon sa kolehiyo, ukon ano man ang ila mga plano agud nga may salandigan sa mga datus nga mangin balasehan sa paghimo sang masunod nga tikang angot sa sini nga K-12 program.

Kaangay sa ginahimo sang mga unibersidad, ila ginahibalo kon ano kadamo sang ila mga gradwado ang nakakita sang trabaho, ang nag-eskwela sa mas mataas nga pagtulun-an, ang nagsulod sa negosyo, ang nagpadulong sa luwas sang pungsod, kag iban pa nga datus nga mangin basehan sa kon paano nakabulig sa ila ang ila kurso sa ila paglab-ot sa ila mga handom sa kabuhi.

Ang pagrebyu sa K-12 program sa karon wala nagakahulugan nga may ligwaton kundi may yara lang sang talupangdon. ([email protected]/PN)

LEAVE A REPLY

Please enter your comment!
Please enter your name here