NAGPANGLUBAYBAY antes makatindog.
Nagpalangdusmo antes magbakod ang tuhod.
Nagtakang-takang antes nangin madasig ang pagtikang.
Napaidalom ang tanan sa proseso. Ginaduso sang handom kag ginapaabante sang intensyon tubtub nga nangin madinalag-on kag nalab-ot ang kadalag-an nga lubos gid nga ginalauman.
Nagsugod ang tanan sa plano kag sa tuyo nga makilala ang banwa sang San Lorenzo sa probinsya sang Guimaras sa patag sang turismo. Nagpasakop sa Manggahan Festival kag nagpanguna sa tanan nga nagpasakop.
Nagdaug ang Tribu Mangunguma sang Manggahan Festival sa 2018 Iloilo Dinagyang Festival kag ang Tribu San Lorenzohanon sang tuig 2019. Paagi sa Tribu Mangunguma nga nagpasundayag sa New York sa tion sang ila independence day, mas makilala pa ang banwa, indi lang sa Western Visayas kundi lakip man sa bug-os nga pungsod kag kalibutan.
Nangin “community effort” ang tanan nila nga paghimakas, kabuylog ang ila alkalde sadto nga si Mayor Jimmy Gajo kag sang alkalde karon nga si Mayor Ninfa Gajo, upod man kay Sangguniang Bayan (SB) member Lino Galea kag tanan nga pumuluyo.
Paagi sa paghimakas ni Sangguniang Bayan member Lino Galea ang chairman sang committee on tourism sa sini nga tuig, sa bulig sang local government unit kag mga pumuluyo sang ila banwa, natigayon nila nga mapagkit sa maragtas ang kadalag-an kag kadungganan sang banwa sang San Lorenzo sa patag sang turismo.
Wala nagkulang sa pagsuporta ang local government unit (LGU) sang San Lorenzo sa mga kabataan nga kabahin sang ila ginpasakop nga tribu. Ginasugat kag ginadul-ong ang mga kabataan, ginahatagan sang pagkaon kag tanan nga kinahanglanon agud mangin inspirado kag lubos nga magpakita sang ila abilidad sa paglab-ot sa kadalag-an sang ila banwa.
Sa pagpanguna ni Mayor Ninfa Gajo kag ni SB member Lino Galea, ang chairman sang committee on infrastructure sadtong 2013 tubtub 2016, napasad ang Market Code sang ila banwa sang tuig 2013 nga amo ang salandigan sang mga pumuluyo sa ila mapagsik nga negosyo sa ila merkado, natukod man ang madamo nga mga covered gym, napatahum ang plaza kag madamo pa nga mga proyekto nga nagahatag sang benepisyo sa mga tawo.
Malawig man ang pag-usoy sang San Lorenzo sa banas padulong sa kauswagan. Suno kay SB member Lino Galea nga amo man ang chairman sang committee on legal matters, appropriation kag tourism, bataon pa ang ila banwa nga magasulog pa lang sang iya ika-24 ka tuig nga pagpasad apang halos 80 porsyento na nga nakalagas sa mga katupad sini nga mga banwa nga halos tatlo ka pilu ang edad ukon madugay na nga nangin banwa.
Nagapati si SB member Lino Galea nga madamo pa sang pag-imprubar nga makita sa ila banwa, mga proyekto nga naangot sa turismo, kon paano mas maakomodar kag maatipan ang mga bisita kag makahatag sang masaligan nga palangabuhian sang ila mga pumuluyo.
Nakita sini ang ikasangkol sang ila banwa agud nga mas kilalahon sa patag sang turismo.
Umpisa sadtong 2014 sang natukod ang windmill sa ila banwa, mas nagdamo ang mga turista kag halos nalabawan na ang nagapanguna nga banwa sang Nueva Valencia nga nagapabugal sang iya maanyag nga doog, maputi nga balas kag makagalanyat lugar sa madamo nga mga beach kag beach resort nga iya ginabugal.
Lauman na nga ang banwa sang San Lorenzo mangin doog sang turismo sa probinsya sang Guimaras. (bertladera@gmail.com/PN)
