SA MASAMI, ang kahadlok (fear) gina-trigger ini sang pamahog sa aton kabuhi (life threatening), sa ikaayong lawas (health), kag sa aton ikaayo nga kahimtangan (well-being) sa kabug-usan – matuod man ukon imagined lang.
Sakop na sini ang mga pamahog sa aton pisikal, emosyonal, ukon sikolohikal nga kaayuhan.
In fact, ang kahadlok bahin sang aton kinaiya nga udyok (instinct). Matun-an man naton ang kahadlok sa aton experyensya ukon sa aton matudlo sa aton kaugalingon ukon sang matudlo man sang iban.
Ang masaktan (harmed), por ejemplo, gahatag sa aton sing instinctive nga kahadlok sa pamahog sini sa aton padayon nga pagkabuhi (survival).
Ang kahadlok matun-an man naton sa aton pakig-relasyon sa iban nga tawo, lugar, ukon sitwasyon sa diin may negatibo kita nga asosasyon ukon experyensya.
Ang pila ka kahadlok pwede man naton itudlo sa aton kaugalingon, katulad sang pagpa-abenturar sa mga hilimuon nga samtang makahatag sing kahadlok sa aton matantiya man naton nga masarangan atubangon.
Katulad sang amat-amat nga pagtudlo, sa diin pwede man kita makapatudlo sa iban, sang kahadlok sa aton kaugalingon sa una nga experyensya sa paglangoy, pagdalagan sing madasig, ang pag-risgo sa mountain biking, kag iban pa tubtub nga mahimo na naton ang sobra sangsa kinaandan naton nga masarangan, nga natural igakalipay naton tungod gani sa matigayon nga dugang ukon bag-o nga abilidad.
In other words, may benepisyo man ang mag-experyensya sing kahadlok.
***
Sa likud sining mga kahadlok, yara man ang instinctive nga kaisug sang tawo, ang natun-an naton sa aton asosasyon kag experyensya, ukon ang matudlu man sa aton sang iban.
Yara dira sa aton ang instinctive nga kaisug (courage) agud pangapinan ang aton kabataan kag mga pinalangga, sa diin ginarisgo naton ang aton personal nga kaayuhan.
Yara man ang kaisug agud ibato ang palangga naton nga pungsod batok sa mga kaaway, kag tindugan sing matuod-tuod ang aton mga kinamatarong nga indi naton mayaub sa kon sin-o man, isahanon man ukon may kaugyon, batok sa mga manuglupig.
Subong man ang tinun-an ta nga kaisug agud tindugan ang aton pagtuo sa Ginuo bilang martir ukon hangaway agud ipadaug ang kagamhanan sang Ginuo sa aton katilingban.
Yara pa gid ang kaisug nga matudlo naton sa aton kaugalingon agud irisgo ang aton kaugalingon agud mabuhi ang aton pamilya.
Katulad bala sang mangingisda nga gasulay sa kalain sang panahon sa lawod agud makahulik sang isda agud ipakaon sa iya kabataan kag asawa samtang nagapangamuyo sang pag-amlig sa iya sang Ginuo samtang nagapangisda.
Kag katulad man sa matun-an naton nga kaisug kag pagpangisug (daring) sa pag-risgo sang kaugalingon agud malutsan ang kapintas sang COVID-19, agud padayon kita nga mabuhi kag ang aton pamilya nga indi mapitsil sang kahadlok samtang nagapatigayon sang aton kabuhian.
***
Salamat kay sa karon indi naton kinahanglan magyaub sa COVID-19 nga nagapakuribong nga wala sing mahimo sadtong wala pa kita sing nahibal-an parti sini.
Karon natun-an na naton ang bagay nga kaisug sa bulig sang masaligan nga ihibalo kag panugyan sang aton mga scientist kag health authorities agud padayon nga mabuhi sing may pagsalig bisan sa tunga sa sining pamahog sang COVID-19.
In other words, okey lang kita basta ginasunod naton ang panugyan sa paggamit sang face mask sa publiko, pag-distancia halin sa iban, paglikaw sa gutok nga mga lugar, pagpanghugas gamit ang habon kag tubig ukon sanitizer, paglikaw sa pagtandug sang mahigko nga kamot sa ilong, baba kag mata kay dira nagasulod ang COVID-19 virus, pagpabakud sang aton immunity sang bagay nga mga pagkaon, indi pagpalya sa bulong kon may ginabatyag nga makapahina sa aton, kag ang indi gid pagbulag sa Ginuo.
Kag kon magmasakit gid man sa COVID-19, daku man ang aton paglaum nga ma-survive naton ini tungod 80 porsyento sini mga “mild” lang nga mga kaso kag may mga bagay man nga bulong nga mahatag sang gobyerno.
Tungod sini, sin-o pa ang nahadlok sa COVID-19? Kon may kahadlok pa gid man, na-overwhelm na ini sang kaisug nga natun-an naton gani sa panugyan sang mga health authorities, upod sa lubos nga pagtugyan naton sang aton kaugalingon kag pamilya sa Ginuo./PN
