NAAGOM sang probinsya sang Antique ang pagkilala bilang hilway sa impluwensya sang insurhensya sang komunista sadtong Marso 18, 2013 kag ini ang ikaduha nga probinsya sa isla sang Panay nga gindeklarar sang mga militar.
Una nga gindeklarar nga hilway sa insurhensya ang probinsya sang Aklan sadtong Disyembre 8, 2011 bangud man sang negatibo nga pagtuhaw sang mga makahas nga insidente nga maangot sa pwersa sang insurhensya sa nakalipas nga apat ka tuig umpisa sang deklarasyon.
Ginpangunahan sadto nanday Major General Jose Mabanta Jr. ang commander sang 3rd Infantry Division sang Philippine Army kag ni anay Governor Exequiel Javier ang pagpirma sa joint declaration bangud man sa nagagamay nga numero sang Communitst Party of the Philippines-New People’s Army sa nasambit nga lugar.
Sadtong Abril 2017, anum ka mga probinsya sang Visayas ang ginkabig nga hawan na sa mga komunista nga insurhensya kag suno kay Major General Jon Aying ang Division Commander sang 3rd Infantry Division nga naresolbar na ang problema sang insurhensya sa Antique, Aklan, Guimaras, Siquijor, Cebu kag Bohol.
Katuyuan sang sini nga deklarasyon nga maganyat ang mga negosyante nga magpahamtang sang ila negosyo sa sini nga mga lugar agud nga makahatag sang trabaho sa mga pumuluyo, mapapagsik ang ekonomiya kag mapa-uswag ang lugar.
Kon malinong kag matawhay kag hilway sa insurhensya ang isa ka lugar, indi magpang-alang alang ang mga negosyante sa pagpalapit kag magtukod sang negosyo, mamgin kampante man ang mga bisita, lokal man ukon dumuluong, nga magpadulong kag maglagaw ukon magbakasyon.
Bangud nga ginpabugal sadto sang Antique ang iya kahimtangan, natigayon ang pinakauna nga pag-host sini sang Palarong Pambansa kag iban pa nga mga sports events.
Gindugukan ang iya mga tourist destinations kag nagdamo ang mga nagpadulong kag nagapadulong sa probinsya sang Antique agud nga makita ang iya maanyag nga mga manggad nga duna nga regalo nga dapat ipabugal sa iban.
Gina-amat amat talupangod ang iya kahimtangan, gina-imprubar ang iya dalan, ginatutukan ang iya mga pantalan kag mga pasilidad kag istruktura nga makabulig para sa pagpabilin sang mga bisita sa sini nga probinsya.
Apang, nagtuga sang kahangawa ang mga insidente sang pagpangsunog sa mga heavy equipment sang mga kontraktor sa duha ka banwa sa probinsya sang Antique.
Ginalakipan ini sang backhoe kag multi-cab sang F and J Construction sa Barangay San Juan, Sibalom sadtong Hunyo 1 kag ang pagsunog man sa motor grader heavy equipment nila sa Barangay Fabrica, Hamtic sadtong Hunyo 2.
Posible nagapalab-ot lang sang mensahe ang mga rebelde nga may yara pa sila sang pwersa nga mabudlay pukanon kag nagapabilin ang ila presensya sa sini nga probinsya.
Apang ang pamaagi sang mensahe ang makatuga sang negatibo nga epekto sa mga pumuluyo sa mga bisita kag sa mga negosyante sa probinsya.
Indi makaabante ang Antique kon padayon ini nga nakahigot sa nakaligad, kon ginabangilan sang insurhensya kag kon ginabulit sang maitom nga abo ang iya maanyag nga panapot.
Mahimo masugilanunan sa ibabaw sang lamesa ang mga hibubun-ot kag indi dapat maghimo sang akto nga makatuga sang tap-ing sa nawong sang kalinong. (bertladera@gmail.com/PN)
