ANG China nag-offer agud i-prioritize ang paghatag (pagbaligya guro) sang vaccine kontra COVID-19 sa Filipinas. Kon ara na, siyempre. Wala pa man!
Aba, huwag! Kon may fake news, sobra-sobra gid ang pagka-fake sang China. Substandard na ang mga produkto nga gina-import diri sa Filipinas, makahililu pa ang mga hampanganan nga ginabaligya sa aton mga kabataan.
Mas fake pa gid ang iya relasyon sa aton. Illegal na ang ila pag-okupa sang daku nga bahin sang South China Sea tungod sa pagka-pierde sini sa International Criminal Court pabor sa Filpinas kag iban pa nga claimants diri, luyag pa sini intuon kita sang iya COVID-19 vaccine nga wala pa gani dahum-dahum kon magamit na.
Sa clinical trial pa lang pwede na kuno magamit ini. Sus a! Daw Dengvaxia nga wala pa ma-confirm nga “safe” gamiton ginpatulon na sa aton mga kabataan. Ti, madamo gid ang nagreklamo. Madamo na gani nga akusasyon ang napasaka angot sa pagkapatay sang mga kabataan tungod sini.
Samtang hipos-hipos lang ang Estados Unidos, ang India, ang United Kingdom kag iban pa nga gapadayon sang ila clinical trials para maseguro kon bala indi lang “effective” ini kundi “safe” man, nga amo gid ang mayor nga dapat seguruhon. Anhon ta abe ang “effective” nga bulong kon mapatay man lang ang pasyente despues.
Indi gid kita magsalig sa sining made-in-China nga vaccine! Sining ulihi lang gani, nahibal-an nga madamo ang fake sa ila ginbaligya nga mga face mask kag personal protective equipment (PPE) para sa COVID-19.
In fact, nagpakuno-kuno pa sila nga wala nahibal-an parti sa COVID-19 tubtub naglapta na ini sa bug-os nga kalibutan.
In other words, mas “safe” ka pa nga maigu sang mild COVID-19 infection (80 ka porsyento diri a Filipinas), nga eventually mangin immune ka sa pag-ayo mo na, sangsa sa ining Chinese vaccine.
***
Halos isa na ka bulan ang ginahimo sang MORE Power nga preventive maintenance sang ila mga service units agud mangin mas masaligan kuno ang pagserbisyo nila sa mga pumuluyo sang siyudad sang Iloilo.
Ugaling lang kay kalawig gid sini nga nagalab-ut 10-13 oras, katulad sang natabo sa La Paz kag Jaro. Kag daw langkuyon gid nila ini sa lima pa ka distrito sang siyudad.
To be fair sa MORE, kami sa Mandurriao may mga brownout man. Pero okey lang kay matayog na ang 15 minutos kag mabalik man ang kuryente, kag malaka man matabo.
Gapasalamat man kita sa MORE sang kaukod sini sa pagpanglagas sang illegal connections, nga nagadugang sa balayran sang honesto nga konsumidor. Sa matandaan namon sa amon billing, ang systems loss nagalab-ut sa 16 ka porsyente. Hamak mo ina nga lukduhon pa sang mga pumuluyo nga wala nagakawat sang kuryente.
Pero, wala gid kita sing dapat pasalamatan sa malawig nga brownout nga tuga sining preventive maintenance sang MORE. Perhwisyo gid! Hambala pa kon ano ini nga mga perhwisyo sa aton pangabuhi kay magasaka lang ang imo blood pressure.
Madamo kuno ang dapat kalaayuhon sa mga service units, nga madamo sini wala pa seguro ma-repair sa kadugayon ukon maislan sang nagakadapat.
Pero kinahanglan gid bala ang kasubong kadugay ining preventive maintenance – 10 tubtub 13 ka oras? Indi bala pwede ini i-schedule utay-utay agud indi man tuman kadugay gid?
Kon nahimo sang PECO ang malikawan ang kasubong nga problema sa brownout sadto, indi ayhan kaya man ini sang MORE? Well, indi seguro tungod gani sa sining madugay nga pagluntad sang mga brownout.
Indi bala ginpasalig sang MORE ang Kongreso nga tagaan sing maayo nga serbisyo ang mga konsumidor kag malikawan na ang probema sa idalom sang PECO? In fact gintagaan ang MORE sing frankisa tungod sa sining ila pasalig.
Ti, ara na ang ginasiling ninyo nga maayo nga serbisyo!
Kon indi kamo makasarang, kag pasalig lang gali sa Kongreso ang kaya ninyo, tani nangita man lang kamo sing expert sa problema sang PECO nga inyo ginpanubli.
Yara man si Engr. Randy Pastolero, ang anay PECO oprations officer nga karon executive assistant sa City Hall sa kuryente sang siyudad.
Tawgi lang ninyo si Engr. Pastolero kg segurado makabulig ini kon paano solbaron ang problema sang madugay nga brownout.
Indi bala, Engr. Pastolero?/PN
