NAPAMATUD-AN sing indi lang isa ka bes nga “Love conquers all”. Indi lang tungod lapaw sa manggad kag kadungganan ang pagpalabi sa pinalangga, kundi bisan pa gani agud madaug ang isa ka kawsa sa maalungayon nga paagi.
Madamo kita sing ejemplo sa mga royalty nga ginsikway ang ila titulo agud lang makaupod ang pinalangga nga halin sa ordinaryo nga kahimtangan.
Isa sa mga famoso nga istorya sang paghigugma amo ang kaso ni Prince Edward VIII nga ginsikway ang maging hari sang Inglatera agud pangasaw-on ang isa ka diborsyda nga Amerikana nga si Wallis Simpson sadtong 1936.
Yara man si Japanese Princess Atsuko, sadto 21 anyos nga anak ni Emperor Hirohito, nga nagbiya sang iya titulo agud mapamana ang isa ka negosyante nga si Takamas Ikda, 25, sadtong Oktubre 1952.
Si Princess Ubolratana sang Thailand nagbiya man sang iya titulo sa iya pagpamana sa kay Peter Jensen nga isa ka American student nga nakilala niya sa Boston school sadtong 1972.
***
Samtang, gingamit naman ni Mahatma (Venerable) Gandhi agud dag-on ang bug-os nga pwersa sang British Rule paagi sa “non-violent resistance”.
Sunu mismo sa iya, “Duha ka klase ang pagpakita sang Gahum (Power). Ang isa paagi sa pagtuga sang kahadlok paagi sa pagsilot sa mga pumuluyo, kag ang isa sa pag-alungay ukon sa mahigugmaon nga paagi (Acts of Love).”
“Ang ikaduha mas epektibo sing isa ka libu ka pilu sangsa nahauna,” pamat-ud gani niya.
Si Mahatma Gandhi – Mohandas Karamchand Gandhi, sa matuod nga ngalan – isa ka abogado nga taga-India nga nanguna sa kampanya agud maangkon ang kahilwayan (independence) sang India halin sa gamhanan nga Britanya, nga wala naggamit sing maduguon nga rebolusyon.
Paagi sa “non-violent resistance”, ginpakita ni Gandhi kag sang iya sumulunod ang Power of Love versus Love of Power agud ipadaug ang ila kawsa para maangkon ang independencia sang India, nga naangkon gid man nila sadtong Agosto 1947.
Nag-inspire ini sa balo ni Senador Benigno Aquino Jr. nga si Corazon Cojuangco Aquino agud pangunahan man ang pagtumba sang martial law regime ni anay President Ferdinand Marcos paagi sa bloodless revolution, ukon Edsa Revolt, sadtong 1986.
Napabalik sini ang Filipinas sa Demokrasyahon nga pangginahum sa idalom ni Presidente Cory Aquino, nga nagbugras sang tanikala sang gahum militar kag nagpaluntad sang hilway nga pangabuhi sang mga pumuluyo nga ginpabakud sa idalom sang 1987 Constitution.
Sa idalom sang sining konstitusyon ginpabakud ang kahilwayan sang mga pumuluyo sa madamo kag importante nga mga kinamatarong. Lakip sini ang pagpasiguro sang “due process” sa kon sin-o man nga suspetsado nga dapat anay mapamatud-an ang kasal-anan sa isa ka “fair and just trial”, kag ang hilway nga pagpahayag sang balatyagon sang mga pumuluyo batok sa mga opisyales sang gobyerno, nga sa aton Demokrasya mga suluguon sang banwa.
Sa aton gindaug nga Demokrasya, ginatindugan man naton ang pag-respeto sa pila ka importante nga bagay sa aton pribado nga pagkatawo kag relasyones.
Wala naton gina-criminalize ang suicide kay personal ini nga desisyon sang isa ka tawo nga sabton lang niya sa Diyos; ang ma-assign sa isa ka suicide mission kon soldado sa ngalan sang ila gugma sa pungsod; ang mag-risgo agud luwason sa peligro, katulad sang sunog kag pagkalumos, nga pwede naton ikamatay; kag sa iban pa nga sitwasyon nga ang konsyensya ang mayor nga manunudlo sang kabuhi.
Labaw kag labi sa tanan, ang kinamatarong sang mag-asawa nga tindugan ang ila sinumpaan – :”for better or for worse; for richer or poorer; in sickness and in health; to love and cherish, til death do us part.”
Tungod sini, dapat may exception sa kaso sang mag-asawa agud mapasugtan ang riding-in-tandem sa motorsiklo sang mag-asawa sa kinahanglanon nila nga pag-upod bisan pa sa gina-requirer nga social distancing sa padayon naton nga away batok sa COVID-19.
Isa pa, inutil na ina ya ang pagsulundan nga bulagon mo sila sa motorsiklo samtang pirme man sila nagahulid sa isa ka hiligdaan. (w_mateojr@yahoo.com/PN)
