NAGLAUM ang tanan nga tumalan-aw sang 2020 Dinagyang Festival nga may tuhay sila nga makita sa highlight kag kon ano ang kahulugan sang ginapabugal nga 360 degrees.
Napuno ang aton dulunggan sa mga pasalig kag pabugal nga mangin tuhay nga selebrasyon ang aton lauman sa bag-o nga tagdumalahan. Ginabantala gid nila nga mas manami ang kahiwatan kag pinasahi nga eksperyensya ang aton maaguman.
Matuod nga nangin madinalag-on ang paghiwat sang Dinagyang Festival bangud nagbuylog ang tanan, wala sang isa sa aton ang luyag nga mabutang sa kahuy-anan ang aton ginapabugal kag ginatunaan sang aton dungog.
Apang, ang kinaandan nga gawi amo nga tuman ka atrasado ang pag-umpisa sang programa bangud madamo sa gihapon sang mga nagapasaway kag mga hambog nga pamatyag nila sila ang importante sa programa.
Mahuyugon kita sa seremonya nga wala sang esensya. Malawig ang pamulong-pulong nga daw kaangay lang nga nagapangampanya sa tion sang eleksyon.
Kuntani limitahan naton ang pagpamulong-pulong sang mga pulitiko kag dapat ang ila mensahe may kaantanan sa selebrasyon. Ang tawo nagkadto agud nga maglantaw sa performance sang mga tribu kag indi agud magpamati sa pabugal kag tinikal sang mga pulitiko.
Kahuluya batyagon bangud madamo sang mga bisita nga lokal kag dumuluong ang wala nanamian sa pamulong-pulong sang mga pulitiko. Nayubit sila sa mga ginapangwakal. Naga-igham kag nagapangyam-id sila sa kada pag-askad sang tutunlan sang mga nagawakal sa mikropono.
Wala gid kita nagtuon sa leksyon sang mga nagliligad. Dapat itigana sa panahon sang kampanya ang malawig nga pamulong-pulong kag indi paggamiton nga higayon ang okasyon.
Kaangay sang nagliligad, ginadalukan naton ang mga tumandok sang Iloilo nga makita ang performance sang mga tribu. Kon wala ka sang linibo nga kwarta, indi ka makakita sang performance kag indi ka makawesto sang maayo.
Naglipas na ang panahon nga ang mga tawo nagahilira sa kilid sang dalan, naga-uyat sang lubid nga ginabarikada sang mga estudyante nga kadete sang ROTC. Bisan paano makakita sila sang pagpasundayag sadto, apang sa karon, ang Dinagyang para na lang gid sa makasarang kag sa mga manggaranon.
Mas pa gid nga naatrsara ang performance sang kada tribu bangud sa madamo nga tagsakdag nga naga-ikog. Kuntani limitahan lang sa apat ka vertical ads nga may walo ka tawo ukon duha ka horizontal ads nga may walo pa ka tawo agud nga may magabulos-bulos sa maga-uyat kon may nakapoy na.
Limitahan man sa lima ka sponsor kag pauna-una sila ukon padaku-daku sang sponsorship agud nga malakip sa lima ka pagahunutan nga sponsor nga maga-upod sa kada tribu.
Mas kontrolado na sang mga elitista sang syudad ang selebrasyon. Napuno na sang negosyo ang tanan kag ang kada pagyuhom ukon pagharakhak ang may balayran nga nagahulat.
Sadto ang kada isa ka tumalan-aw nagabitbit sang bangkito agud may mapatungan kag agud makakita sang pagpasundayag sa kada tribu. Yara sila sa luyo kag hilway nga makalantaw sa performance.
Nagkitid na gid ang kalibutan sang mga pigado, sadto nagahimakas sila nga makalusot ang ulo kag makakita ang mata, apang sa karon natabunan na sila sang mga may kwarta.
Ginpabugal ang 360 degrees nga performance apang ang maka-apresyar sini amo man lang ang makasarang.
Nagapabilin nga “zero visibility” sa performance ang kadamuan. Tuhay ang aktwal kaysa maglantaw lang sa video ukon sa social media.
Matuod nga ang tanan indi mahatagan sang kahigayunan apang sa talaksan sang kwarta, makalantaw gid ang may ikasarang. (bertladera@gmail.com/PN)
